खोज

काठमाडौँ ।

बुटवलस्थित सुप्रिम सहकारी संस्थाको रकम ठगी तथा सङ्गठित अपराधसम्बन्धी मुद्दामा थुनामा रहेका राष्ट्रिय स्वतन्त्र पार्टी (रास्वपा)का सभापति रवि लामिछाने र तत्कालीन गोर्खा मिडियाका सञ्चालक छविलाल जोशीको मुद्दा कानुन व्यवसायीहरूको आवेदका आधारमा तीन पटकसम्म स्थगित भइसकेको छ ।

लामिछाने र जोशीको मुद्दा एकैसाथ सुनुवाइ हुँदै आएको भए पनि दुवै पक्षका कानुन व्यवसायीहरूले छुट्टाछुट्टै निवेदन दिएर तीन पटक सुनुवाइ रोकाएका हुन् । लामिछानेका तर्फबाट दुई पटक र जोशीका तर्फबाट एक पटक स्थगित गरिएको उच्च अदालत तुलसीपुर, बुटवल इजलासले जनाएको छ ।

अधिवक्ता कीर्तिनाथ शर्मा पौडेलका अनुसार, कानुन व्यवसायीहरूले उचित कारण देखाएर सुनुवाइ स्थगित गराउन पाउने भएकाले अहिले सम्मका स्थगनलाई अस्वाभाविक भन्न नमिल्ने बताए । “एउटै मुद्दा ५–७ पटकसम्म निरन्तर स्थगित भए मात्र प्रश्न उठ्न सक्छ,” उनले भने, “तर अहिले निवेदकले आफूअनुकूल समय खोज्दा पनि स्थगन हुन पुगेको शंका भने उठ्न सक्छ ।”

उच्च अदालत बुटवल इजलासमा कात्तिक १३ गते तोकिएको पहिलो पेसी जोशीका कानुन व्यवसायीको निवेदनमा स्थगित गरिएको थियो । कात्तिक २७ गतेको सुनुवाइमा न्यायाधीश वासुदेव आचार्य र ओमप्रसाद अर्यालको संयुक्त इजलासले मुद्दासम्बन्धी मूल मिसिल सर्वोच्च अदालतबाट माग गर्ने आदेश दिएको थियो । मिसिल प्राप्त भएपछि तोकिएको अर्को पेसी अघिल्लो बिहीबार पनि स्थगित भएको थियो ।

कात्तिक २० गते पनि सुरु मिसिल माग्न आदेश दिइएको थियो । सर्वोच्चले सुरु मिसिल नपठाए पनि जिल्ला अदालतबाट प्राप्त प्रतिलिपि इजलासमा आएको छ ।

चौथो पटक मंसिर ४ गते न्यायाधीश मिलनकुमार राई र सानुमैयाँ डंगोलको संयुक्त इजलासमा तोकिएको पेसीमा लामिछानेका कानुन व्यवसायीले उच्च अदालत पाटनमा तोकिएको अर्को पेसी देखाएर सुनुवाइ स्थगित गराएका थिए । मंसिर ११ गतेको पेसी पनि लामिछानेकै तर्फबाट दोहोरो निवेदनमा स्थगित भयो ।

लामिछानेले थुनाबाहिर बसेर मुद्दा लड्न पाउन बिगो बराबरको रकम बुझाइसकेको दाबी गर्दै उच्च अदालतमा निवेदन दिएका थिए । उच्च अदालतले उनको निवेदनसँगै जोशीको फाइल पनि पेस गर्न आदेश दिएको थियो । यसअघि उच्च अदालत बुटवलले लामिछानेको मुद्दामा कैफियत प्रतिवेदन मागेको थियो ।

सुप्रिम सहकारी ठगी प्रकरणमा लामिछानेसहितका प्रतिवादीविरुद्ध १० करोड ९९ लाख ३६ हजार रुपैयाँको सामूहिक बिगो कायम गर्दै अभियोगपत्र दायर गरिएको छ ।

चार जनामा बाँडिएका बिगोमध्ये लामिछाने र जोशीले आफू–आफ्नो भाग बराबरको रकम (२ करोड ७४ लाख ८४ हजार रुपैयाँ) बैंक जमानतका रूपमा पेस गरिसकेका छन् ।

तर उनीहरूको भागमा कति बिगो पर्छ भन्ने स्पष्ट नहुँदा दुवैलाई रिहा गर्न नमिल्ने ठहर गर्दै अदालतले समान प्रकृतिको आदेश दिएको थियो ।

हाल दुवै जना पुर्पक्षका लागि थुनामा छन् । भैरहवा कारागारमा रहेका लामिछानेलाई हालै ललितपुरको नख्खु कारागार सरुवा गरिएको छ भने जोशी भने भैरहवा कारागारमै रहेका छन् ।