खोज

काठमान्डौ, १४ मंसिर ।

गैरआवासीय नेपाली संघ (एनआरएनए) का दुई पक्षबीच लामो समयदेखिको विवाद अन्त्य गर्दै आज ऐतिहासिक एकता सहमतिपत्रमा हस्ताक्षर गरिएको छ । प्रधानमन्त्री सुशीला कार्कीको उपस्थितिमा महेश श्रेष्ठ र डा. बद्री केसीले एकता सम्बन्धी सहमतिपत्रमा हस्ताक्षर गर्दै संघलाई एकीकृत नेतृत्वमा अघि बढाउने घोषणा गरेका हुन् ।

पछिल्ला केही वर्षदेखि एनआरएनए दुई भागमा विभाजित थियो—एक पक्ष महेश श्रेष्ठको नेतृत्वमा र अर्को पक्ष डा. बद्री केसीको नेतृत्वमा । मुलुकभित्र बदलिएको राजनीतिक परिवेश र विश्वभर रहेका एनआरएनहरूको दबाबबीच दुबै पक्षले १० बुँदे सहमतिमा पुगेर एकताबद्ध हुने निर्णय गरेका हुन् ।

सहमतिअनुसार आगामी १२औं अन्तर्राष्ट्रिय महाधिवेशन १७ अप्रिल २०२६ सम्म सम्पन्न गरिनेछ । केसी नेतृत्वको कार्यसमिति एकता प्रक्रियाअन्तर्गत श्रेष्ठको नेतृत्वमा हुने महाधिवेशनमा सहभागी हुँदै एकीकृत ढाँचामा अघि बढ्ने सहमति भएको छ ।

महाधिवेशन पारदर्शी, निष्पक्ष र विश्वासयोग्य बनाउन ११ सदस्यीय स्टेयरिङ कमिटी गठन गरिनेछ । स्टेयरिङ कमिटीका सदस्यहरू १२औँ महाधिवेशनमा उम्मेदवार नबन्ने भन्ने प्रावधान पनि सहमतिमा समावेश गरिएको छ ।

एनआरएनए नेतृत्वको आधिकारिकता लगायतका विषयमा विभिन्न समयमा दायर भएका सबै अदालत मुद्दा फिर्ता गर्ने सहमति पनि भएको छ । १० बुँदे सहमति परराष्ट्र मन्त्रालयका प्रतिनिधिको रोहवरमा हस्ताक्षर गरिएको छ र मन्त्रालयमै अभिलेखित गरिनेछ ।

सहमतिको पहिलो बुँदामा २०२३ अक्टोबर १७–२० मा सम्पन्न एघारौं अन्तर्राष्ट्रिय महाधिवेशनबाट निर्वाचित डा. बद्री केसीको नेतृत्वको कार्यसमितिलाई स्वीकार गर्ने तथा संघका पूर्वअध्यक्ष डा. शेष घलेको संयोजकत्वमा गठित उच्चस्तरीय समितिद्वारा २०२५ मे ३–४ मा आयोजित एकता महाधिवेशनबाट महेशकुमार श्रेष्ठको नेतृत्वमा निर्वाचित कार्यसमितिलाई स्वीकार गर्ने उल्लेख छ ।

सहमतिको दोस्रो बुँदामा गैरआवासीय नेपाली संघको १२औं महाधिवेशन १७ अप्रिल २०२६ सम्ममा सम्पन्न गर्ने र त्यसका लागि महेशकुमार श्रेष्ठको नेतृत्वमा बनेको समितिको कार्यकाललाई पूर्ण कार्यकाल मानिने भनिएको छ ।

विभिन्न समयमा एनआरएनको नेतृत्व गरेका डा. बद्री केसी, कुल आचार्य, रबिना थापा, विनोद कुँवर र राजेन्द्रकुमार शर्माको अध्यक्षतामा गठित यसअघिका कार्यसमितिहरूलाई पूर्व कार्यसमितिको रूपमा अभिलेखीकरण गर्ने भनिएको छ ।

यस्तै, आगामी १२औं महाधिवेशनका अवसरमा, ११औं महाधिवेशनबाट निर्वाचित कार्यसमितिका महासचिव र कोषाध्यक्षले आफ्नो प्रतिवेदन पेश गरी अनुमोदन गराउने, त्यसलाई ११औं महाधिवेशनबाट निर्वाचित अध्यक्ष डा. बद्री केसीले एकताको महाधिवेशनबाट निर्वाचित अध्यक्ष महेशकुमार श्रेष्ठलाई हस्तान्तरण गर्ने सहमति गरिएको छ ।

गैरआवासीय नेपाली संघका दुवै पक्षको आर्थिक पाटोलाई पारदर्शी एवं विश्वासिलो बनाउन स्वतन्त्र तृतीय पक्षबाट अडिट गराउने तथा १० बुँदे सहमति पत्रको कार्यान्वयन र १२ औं अन्तर्राष्ट्रिय महाधिवेशन र निर्वाचनको स्वच्छता, स्वतन्त्रता तथा निश्पक्षताको सुनिश्चितता गर्ने सहमति पत्रको अभिन्न अङ्ग हुने गरी पुरक सहमति गरिने पनि उल्लेख छ ।

सहमति पत्रमा ११औं अन्तर्राष्ट्रिय महाधिवेशनबाट निर्वाचित कार्य समितिका अध्यक्ष बद्री केसी र एकताको महाधिवेशनबाट निर्वाचित कार्यसमितिका अध्यक्ष महेशकुमार श्रेष्ठले हस्ताक्षर गरेका छन् ।