खोज

काठमाडौँ, ०९ मङ्सिर ।

ऊर्जामन्त्री कुलमान घिसिङको संरक्षकत्वमा खुलेको उज्यालो नेपाल पार्टीले रञ्जिता श्रेष्ठको नेतृत्वमा रहेको नागरिक उन्मुक्ति पार्टी (नाउपा)का नेताहरूलाई भित्र्याउने तयारी अघि बढाएको छ ।

उज्यालो नेपाल पार्टी गठन हुँदा विगतमा नाउपामा आस्था राख्ने केही नेताहरू प्रवेश गरिसकेको उज्यालो नेपालका नेताहरूको दाबी छ । उज्यालो नेपालले नाउपासँग पार्टी एकता नगरी नेता तथा कार्यकर्ता भित्र्याउने रणनीति बनाएको छ ।

उज्यालो नेपालका एक नेताले भने, ‘केही नेताहरू जोडिनुभएको छ । अरु नेताहरूसँग पनि कुराकानी भइरहेको छ ।’ उनका अनुसार नाउपाका प्रदेश र स्थानीय तहमा निर्वाचित नेताहरूसँग छलफल भइरहेको छ ।

गत निर्वाचनमा नाउपाबाट कैलालीस्थित टीकापुर नगरपालिकाको प्रमुख पदमा निर्वाचित रामलाल डगौरा थारुले उज्यालो नेपालसँग छलफल भएको जानकारी गराए । डगौरा अनुसार, केही दिनभित्र उज्यालो नेपालसँग मिल्न टुंगो लाग्नेछ ।

उज्यालो नेपालका नेताका अनुसार नाउपा अध्यक्ष रञ्जिता श्रेष्ठलाई भित्र्याउने पक्षमा उक्त दल छैन । उज्यालो नेपालका एक नेताले अनलाइनखबरसँग भने, ‘नयाँ दलमा अनियमिततामा मुछिएका व्यक्ति प्रवेश गराए भने हामी नयाँ दल भएको ठहरिँदैन । विवादमा परेका र भ्रष्टाचारसँग जोडिएका पात्रलाई हाम्रो पार्टीमा स्थान छैन ।’

अनुपकुमार उपाध्यायको नेतृत्वमा उज्यालो नेपाल पार्टी निर्वाचन आयोगमा दर्ता भई मान्यता प्राप्त भइसकेको छ । उज्यालो नेपालमा हाल केन्द्रीय सदस्यको संख्या ५१ छ । उज्यालो नेपालले मंसिर १७ गते घोषणा सभा गर्ने जनाएको छ ।