© २०२३
२० मंसिर २०८२, शनिबार
२० मंसिर २०८२, शनिबार
काठमाडौं ।
हायात रिजेन्सी काठमाडौँले १३३ जना श्रमिक कटौती गर्ने निर्णय गरेको छ। श्रम ऐन, २०७४ को दफा १४५ बमोजिम सो निर्णय गरिएको होटलले जनाएको छ।
होटलले भदौ २३ र २४ गतेको आन्दोलनका क्रममा आपराधिक समूहले होटल परिसरमा प्रवेश गरी तोडफोड, लुटपाट र आगलागी गरेको घटनापछि होटल पूर्ण रूपमा बन्द रहेको जनाएको छ।
हाप्रबन्धक आशीष कुमारद्वारा जारी सूचनामा भनिएको छ, “उक्त घटनाका कारण होटल पूर्ण रूपमा क्षतिग्रस्त भई मर्मत सम्भार नगरी सञ्चालनमा ल्याउन नसकिने अवस्था बनेको छ। मर्मत कार्य सम्पन्न नहुन्जेलसम्म होटल पूर्ण रूपमा बन्द रहनेछ।”
भदौ २४ को घटनाका क्रममा होटलमा रहेका एक विदेशी पाहुनाको ज्यान गएको र अन्य पाहुनाहरूको सरसामान लुटपाट तथा आगजनीमा परेका कारण होटलको अन्तर्राष्ट्रिय प्रतिष्ठा समेत प्रभावित भएको सूचनामा उल्लेख छ।
कोभिड–१९ महामारीका कारण लामो समयसम्म होटल तथा पर्यटन क्षेत्र ठप्प हुँदा होटलले पहिले नै ठूलो आर्थिक क्षति व्यहोरेको र हालसालै मात्र केही सुधार आइरहेको अवस्थामा पुनः ठूलो आर्थिक क्षति व्यहोर्नु परेको होटलको दाबी छ।
“होटल मर्मत सम्भारका लागि करोडौं रकम आवश्यक परेको र सो अवधिमा कुनै आम्दानीको स्रोत नहुने भएकाले होटलले श्रमिक व्यवस्थापनको विकल्प खोजे पनि कुनै निष्कर्षमा पुग्न सकेन,” सूचनामा भनिएको छ।
त्यसै कारण होटलले मर्मत अवधिभर सञ्चालनमा नरहेको अवस्थामा सम्पूर्ण १३३ जना श्रमिक कटौती गर्नुपर्ने बाध्यता आएको जनाएको छ।
यो निर्णय सूचना प्रकाशित भएको मितिले ३० दिनपछि, अर्थात् २०८२ मंसिर २२ गतेदेखि लागू हुने उल्लेख गरिएको छ।
© २०२३
सर्वाधिकार सुरक्षित
Design & Developed By:
