खोज

काठमान्डौ, २० कार्तिक ।

निर्वाचन आयोगमा हाल विभिन्न १८ राजनीतिक दल दर्ताको पर्खाइमा रहेका छन् ।

निर्वाचन आयोगका प्रवक्ता नारायणप्रसाद भट्टराईका अनुसार पछिल्लो पटक नेपाली कम्युनिस्ट पार्टीको दल दर्ता निवेदन प्राप्त भएको छ । यो सहित आयोगमा दर्ताका लागि पुगेका नयाँ दलहरूको संख्या १८ पुगेको हो ।

जेन९जी आन्दोलनअघि आयोगमा ९ वटा दल दर्ताका लागि निवेदन परेका थिए भने आन्दोलनपछि थप ९ नयाँ दलले निवेदन दर्ता गराएका छन् । आयोगका अनुसार यी १८ वटै निवेदन अहिले अध्ययनको क्रममा छन् । हालसम्म आयोगबाट १२५ दलले दल दर्ताको प्रमाणपत्र प्राप्त गरिसकेका छन् ।

आयोगले तोकेको कार्यतालिका अनुसार, दल दर्ताका लागि निवेदन दिएका दलहरूले अबको १० दिनभित्र, अर्थात् कात्तिक ३० गतेसम्म, दर्ता प्रमाणपत्र प्राप्त गर्नुपर्नेछ । निर्वाचन प्रयोजनका लागि मंसिर १ गतेदेखि १० गतेसम्म दल दर्ता गर्ने कार्यक्रम तय गरिएको छ ।

पहिलो हुने निर्वाचित हुने निर्वाचन प्रणालीका लागि माघ २ गतेदेखि निर्वाचन अधिकृतको कार्यालय स्थापना हुनेछ ।

फागुन ३ देखि १८ गतेसम्म निर्वाचन प्रचारप्रसार हुने र तत्पश्चात् प्रचारप्रसार निषेधको अवधि रहनेछ । फागुन २१ गते बिहान ७ बजेदेखि बेलुका ५ बजेसम्म मतदान हुने र दुवै निर्वाचन प्रणालीतर्फको मतपेटिका संकलन भएपछि मतगणना प्रारम्भ गरिने कार्यक्रम छ ।

समानुपातिक निर्वाचन प्रणालीका लागि मंसिर १५ गते निर्वाचन अधिकृतको कार्यालय स्थापना हुने र पुस १८ र १९ गते बन्दसूची पेश गर्ने कार्यक्रम रहेको छ ।

कार्यतालिका अनुसार निर्वाचन प्रयोजनका लागि दल दर्ताको समय मंसिर १ गतेदेखि १० गतेसम्म रहेका छ ।

आयोगका अनुसार नयाँ दल दर्ता गर्न चाहनेहरूले कात्तिक ३० भित्र दल दर्ताको प्रमाणपत्र लिएर, त्यसपछि मंसिर १ देखि १० गतेभित्र निर्वाचन प्रयोजनका लागि पुनः दल दर्ता गर्नुपर्नेछ ।