खोज

काठमाडौँ, १३ कात्तिक।

जिल्ला अदालत काभ्रेपलाञ्चोकमा उपस्थित खगेन्द्र सुनारको बयान र थुनछेकको बहस सकिएको छ । तर अदालतको आदेश आउन बाँकी छ ।

सुनारमाथि अदालतको अपहेलना र अधिवक्तालाई अपशब्द बोलेको आरोपमा विद्युतीय कारोबारसम्बन्धी मुद्दा चलाइएको छ । बिहीबार बिहान उनी जिल्ला अदालत काभ्रेपलाञ्चोकमा उपस्थित थिए ।

सुनारको बयान र थुनछेकको बहस न्यायाधीश नगेन्द्रकुमार कालाखेतीको इजलासमा भएको जिल्ला अदालतका श्रेस्तेदार इन्दिरा कार्कीले जानकारी दिइन् ।

सुनारमाथि अधिवक्ता मनिषा गौतमविरुद्ध फेसबुक स्टाटसमा अपशब्द प्रयोग र सामाजिक सञ्जालमा लाइभ बसेर गालीगलोज गरेको आरोप छ । गौतमको स्थायी ठेगाना काभ्रेपलाञ्चोक भएकाले मुद्दा जिल्ला प्रहरी कार्यालय काभ्रेपलाञ्चोक पठाइएको थियो ।

अनुसन्धानका क्रममा सुनार फरार रहेकोले प्रहरीले उनलाई फरार राखेर साउन २ गते अदालतमा मुद्दा पेश गरेको थियो । उक्त मुद्दा ८२ सालको श्रावणमा दर्ता भएको (८२ सी१–००२ नम्बर) र सरकारवादी फौजदारीको रूपमा कायम भएको थियो ।

अदालतका श्रेस्तेदार कार्कीका अनुसार, साउन ५ गते सुनारलाई पक्राउ गर्न ७ दिन र ३५ दिनको म्यादसहित पक्राउ पुर्जी जारी गरिएको थियो ।

पछिल्लोपटक मन्त्रिपरिषद् विस्तार हुँदा सुनारको नामसमेत सिफारिसमा परेको थियो, तर विभिन्न मुद्दा बाहिरिएपछि अन्तिम समयमा सूचीबाट हटाइएको थियो ।