खोज

काठमाडौँ ।

‘जेनजी’ आन्दोलनका क्रममा देशका विभिन्न कारागार र सुधारगृहबाट भागेकामध्ये अझै करिब पाँच हजार कैदी फरार रहेका छन् ।

प्रदर्शन चर्किएपछि विभिन्न २८ वटा कारागारबाट १३ हजार ५८५ कैदी र ९ वटा बालसुधारगृहबाट ९६४ बालबन्दी गरी जम्मा १४ हजार ५४९ बन्दी भागेका थिए ।

तीमध्ये हालसम्म ९ हजार कैदी र ५८२ बालबन्दी गरी जम्मा ९ हजार ५८२ बन्दी कारागार फर्किएका छन् । कारागार व्यवस्थापन विभागका निर्देशक चोमेन्द्र न्यौपानेका अनुसार अझै पनि ४ हजार ५९६ कैदी र ३८६ बालबन्दी, अर्थात् जम्मा ४ हजार ९८२ बन्दी फरार छन् ।

सरकारले फरार कैदीबन्दीलाई कारागार फर्कन ‘अल्टिमेटम’ दिएको छ । ठूलो संख्यामा विभिन्न कसुरमा सजाय भुक्तान गरिरहेका कैदी फरार भएपछि सुरक्षासम्बन्धी चुनौती बढेको कारण सरकारले फरार कैदीबन्दीलाई नियन्त्रणमा ल्याउन विशेष अभियान सञ्चालन गरेको छ । सो अभियानअन्तर्गत सुरक्षाकर्मीहरूले पक्राउ परेका कैदीलाई सम्बन्धित कारागारमा बुझाइरहेका छन् ।

गृहमन्त्रालयले फरार बन्दीलाई खोजी, नियन्त्रण र फिर्ता ल्याउन सम्बन्धित जिल्लाका सहायक प्रमुख जिल्ला अधिकारीको संयोजकत्वमा कार्यदल गठन गरेको छ । सो कार्यदलमा सुरक्षा निकायका साथै अन्य सरोकारवाला निकायका प्रतिनिधिहरू सदस्य रहने व्यवस्था गरिएको छ ।

‘जेनजी’ आन्दोलनको अवसर पारेर सुनसरीको झुम्का, सोलुखुम्बु, सप्तरी, महोत्तरी, रौतहट, सिन्धुली, काठमाडौंका नक्खु, डिल्लीबजार, जगन्नाथदेवल, मकवानपुर, रसुवा, चितवन, तनहुँ, कास्की, पर्वत, म्याग्दी, कपिलवस्तु, दाङ तुलसीपुर, नौवस्ता बाँके, रुकुम पश्चिम, नवलपरासी, जुम्ला, बझाङ, कैलाली, दार्चुला, बैतडी, डडेल्धुरा र कञ्चनपुरका कारागारबाट १३ हजार ५८५ कैदीबन्दी भागेका थिए । यस्तै, मोरङ, पर्सा, भक्तपुर, मकवानपुर, कास्की, रुपन्देही, जयण्डु, नौवस्ता र डोटीका बालसुधारगृहबाट ९६४ बालबन्दी भागेका थिए ।

सुरक्षा घेरा तोड्ने क्रममा रामेछापमा तीन, धादिङ र सप्तरीमा दुई÷दुई कैदीको गोली लागी मृत्यु भएको थियो । यस्तै, नौवस्ता बालसुधारगृहमा पाँच र डोटी बालसुधारगृहमा एक बालबन्दीको मृत्यु भएको थियो ।

कारागार कार्यालयहरूले फरार कैदीबन्दीलाई अविलम्ब कारागारमा फर्कन आग्रह गर्दै सूचनाहरू जारी गरिरहेका छन् । सरकारको निर्देशनलाई बेवास्ता गर्ने फरार कैदीबन्दीमाथि प्रचलित कानुनबमोजिम कारबाही गरिने कारागार विभागले जनाएको छ ।

हाल देशभरका ७२ जिल्लामा रहेका ७५ वटा कारागार र बालसुधारगृहमा विभिन्न अपराधमा सजाय भोगिरहेका ३० हजार ६४१ कैदी र बालबन्दी रहेका छन् ।