खोज

बुटवल, १० कार्तिक ।

भैरहवामा रहेको यु.सी.यम.यस., शिक्षण अस्पताल कार्यरत नर्सिङ कर्मचारीहरूले अस्पताल प्रशासन समक्ष ‘अकस्मात् रूपमा’ विभिन्न मागहरू राखी यही आन्दोलन गरेपछि प्रशासनले ध्यानाकर्षण भएको जनाएको छ ।

मिति २०८२ कार्तिक २ गते आइतबार कुनै सुनुवाइ गर्ने समय नै नदिई जारी आन्दोलनले यस अस्पतालका अत्यन्त संवेदनशील क्षेत्र आकस्मिक कक्ष, सघन उपचार कक्ष (आइ.सी.यु., सी.सी.यु., एस.आइ.सी.यु. इत्यादि) समेत सहज रूपमा सञ्चालन हुन सकेको छैन ।

केही समय पहिला अदालतबाट अस्पताल सञ्चालन सम्बन्धमा भएका निर्णय तथा नजिर, नेपाल सरकारद्वारा मिति २०७८ मङ्सिर २७ गते राजपत्रमा प्रकाशित अस्पताल जस्तो ‘आवश्यक सेवामा हडताल गर्न निषेध’ गरिएको सूचना, अहिलेको विषयलाई सम्बोधन गर्न नेपाल सरकार, स्वास्थ्य तथा जनसङ्ख्या मन्त्रालयले ‘कार्यदल गठन’ समेत गरिसकेको अवस्था र छाता सङ्गठन नेपाल नर्सिङ सङ्घद्वारा ‘घोषित आन्दोलनका कार्यक्रम तालिका’ विपरीत हुने गरी अस्पतालका सेवाहरू पुर्णरूपमा प्रभावित हुँदा बिरामीहरूको उपचार तथा बाँच्ने पाउने अधिकार समेत कुण्ठित भएकोमा अस्पताल प्रशासनको गम्भीर ध्यानाकर्षण भएको अस्पताल प्रशासनले जनाएको हो ।

अस्पतालका प्रमुख कार्यकारी अधिकृत अजय कुमार पिएसद्वारा जारी विज्ञप्ति अनुसार नेपाल सरकार, श्रम, रोजगार तथा सामाजिक सुरक्षा मन्त्रालयबाट निर्धारण गरेको ‘न्यूनतम पारिश्रमिक’ समेत यस संस्थाले यही मिति २०८२ श्रावण १ गतेदेखि लागू गरिसकेको अवस्था, समस्यालाई नजिकबाट विश्लेषण गर्दै आएको छ ।

अस्पताल प्रशासनले वार्ताको माध्यमबाट विभिन्न चरणहरूमा औपचारिक तथा अनौपचारिक संवाद समेत जारी राखेको, रुपन्देहीका प्रजिअ (सिडिओ) को रोहवरमा छलफल समेत भइसकेको, सरकारद्वारा गठित कार्यदलको प्रतिवेदन मार्फत छिट्टै समाधान आउने आशा राख्दै आन्दोलनरत कर्मचारीहरूलाई यथाशीघ्र कार्यस्थलमा फर्की नियमित कार्यमा समर्पित हुन आव्हान गर्दछ गरेको विज्ञप्तिमा उल्लेख छ ।

वर्तमान परिवेशमा आन्दोलनका कारण कुनै पनि बिरामीलाई प्रतिकुल प्रभाव पर्न गएमा सोको जिम्मेवार तथा जबाफदेही आन्दोलनकारी पक्ष नै हुने समेत अस्पताल प्रशासनले जनाएको हो ।

बिरामीको उपचारलाई मध्यनजर गर्दै आकस्मिक सहित सघन उपचार, प्रसूति लगायत सबै सेवाहरू पुर्णरूपमा सञ्चालनमा ल्याउनको लागि आन्दोलनरत पक्षसँग अनुरोध समेत अस्पतालले गरेको छ ।

उठेका समस्यालाई वार्ताको माध्यमबाट समाधानका लागि आवश्यक ‘समन्वय तथा सहयोग’ गरिदिन हुन स्थानीय प्रशासन तथा सरोकारवाला सबैमा अस्पताल प्रशासन हार्दिक अपिल गरेको हो ।