सामग्री खोज्नुहोस्

बुटवल, २७ असोज ।

गर्भनिरोधका विभिन्न अस्थायी साधनमध्ये कण्डम सबैभन्दा सजिलो, सुलभ र प्रभावकारी उपाय मानिन्छ । सुरक्षित यौनसम्पर्कका लागि यसको प्रयोगले न केवल गर्भ रहनबाट बचाउँछ, बरु यौनजन्य रोगबाट पनि सुरक्षा प्रदान गर्छ ।

कण्डम पुरुषद्वारा प्रयोग गरिने गर्भनिरोधक साधन हो, जसले शुक्राणु महिलाको शरीरमा प्रवेश गर्न नदिई गर्भ रहनबाट रोक्छ । यसका साथसाथै, यो एचआईभीरएड्स, हेपाटाइटिस बी, सिफिलिस, गोनोरिया जस्ता रोगको संक्रमण रोक्ने प्रभावकारी माध्यमका रूपमा पनि परिचित छ ।

स्वास्थ्यकर्मीहरूका अनुसार, अन्य गर्भनिरोधक साधनहरूको तुलनामा कण्डम प्रयोग गर्दा कुनै पनि हार्मोनल असर हुँदैन र दुवै पक्षको सहमति तथा सचेत प्रयोगले यौन स्वास्थ्यमा सन्तुलन कायम रहन्छ ।

कण्डमको प्रयोग विधि :

कण्डम प्रयोग गर्नुअघि यसको म्याद र प्याकेटको अवस्था जाँच गर्नुपर्छ । प्रयोग गर्दा तलका कुरामा ध्यान दिन आवश्यक छः

-प्याकेट सावधानीपूर्वक खोल्ने (धारिलो वस्तुले नफोड्ने) ।

-लिङ्ग उतेजित भएपछि टुप्पोमा सानो खाली भाग छोडी मुनितर्फ रोल गरेर लगाउने ।

-यौनसम्पर्कपछि स्खलन भएपछि तुरुन्तै सावधानीपूर्वक निकाल्ने र गाँठो पारेर फ्याँक्ने ।

-एउटै कण्डम पुनः प्रयोग नगर्ने र पानी वा तेलमा सम्पर्कमा नल्याउने ।

कण्डमका फाइदा :

-गर्भनिरोधको सजिलो र सस्तो उपाय

-यौनजन्य रोगबाट सुरक्षा

-कुनै हार्मोनल प्रभाव वा शारीरिक साइड–इफेक्ट नहुने

-प्रयोग गर्न र पाउन सजिलो, चिकित्सकको सल्लाह अनिवार्य नहुने

-पुरुष र महिला दुवैको सहभागितामा आधारित सुरक्षित विकल्प

कण्डमका बेफाइदा:

-गलत तरिकाले प्रयोग गर्दा फाट्ने वा चुहिने सम्भावना

-केही व्यक्तिमा लेटेक्स पदार्थप्रति एलर्जी हुने समस्या

-संवेदनशीलता घट्ने अनुभवका कारण प्रयोगमा अनिच्छा

-एकपटक प्रयोगपश्चात् पुनः प्रयोग गर्न नहुने

स्वास्थ्य विज्ञहरूका अनुसार, नियमित र सचेत रूपमा कण्डमको प्रयोगले परिवार नियोजनमा मद्दत पुर्‍याउने मात्र होइन, सुरक्षित र जिम्मेवार यौन व्यवहारको संस्कार विकास गर्न पनि सहयोग गर्छ ।

नेपालमा सरकारद्वारा निःशुल्क वितरण प्रणाली सञ्चालनमा रहेकाले कण्डम सहजै स्वास्थ्य चौकी, अस्पताल र फार्मेसीमा उपलब्ध छन् ।