खोज

बुटवल, २३ असोज  –

लुम्बिनी प्रदेशको सांस्कृतिक धरोहर जगेर्ना गर्ने उद्देश्यसहित होटल पौवाले यस वर्ष पनि बडादशैं २०८२ को अवसरमा सराय नाच सांस्कृतिक महोत्सव आयोजना गर्दैछ। तिलोत्तमा–३, योगीकुटीस्थित होटल पौवामा आगामी शनिवार, असोज २५, साँझ ५:३० बजे लोपोन्मुख सराय नाचको भव्य प्रदर्शन हुनेछ।

सराय नाच, जो पहाडी जिल्लाहरू जस्तै गुल्मी, पाल्पा, अर्घाखाँची र स्याङ्जामा प्रचलित छ, धार्मिक र सांस्कृतिक महत्व बोकेको नृत्य हो। यसले दैवी शक्तिले दानव शक्तिलाई पराजित गरेको खुशीयालीलाई चित्रण गर्छ। यस वर्षको महोत्सवमा पाल्पाको मुझुङ रैनादेवी छहारा वडा नं. ५ कालिका युवा क्लबका कलाकारहरूले सराय नाचसँगै विविध सांस्कृतिक नृत्य प्रस्तुत गर्नेछन्।

होटल पौवाका ब्राण्डिङ विभाग प्रमुख बिष्णु भण्डारीका अनुसार, “होटल पौवाले नयाँ पुस्तालाई नेपालको लोपोन्मुख सांस्कृतिक पहिचानसँग जोड्ने निरन्तर प्रयास गर्दै आएको छ। बुटवल शाखाबाट सराय नाचको प्रदर्शनले सांस्कृतिक संरक्षणमा महत्वपूर्ण योगदान पुर्‍याउँछ।”

महोत्सवमा नेपाली परिकारको स्वाद पनि उपलब्ध हुनेछ। योगीकुटी शाखाका व्यवस्थापक प्रकाश पाठकले बताएअनुसार सेलरोटी, बटुक, चुकौनी लगायतका परम्परागत खानाका स्टल राखिनेछन्।

होटल पौवाले विगत ९ वर्षदेखि “जहाँबाट आतिथ्यको सुरुवात हुन्छ” भन्ने नारासहित देशभर १६ स्थानमा सेवा प्रदान गर्दै आएको छ। जुम्ला, धनगढी, पोखरा, काठमाडौं, चितवन, नेपालगन्ज र कालिञ्चोकसम्म फैलिएका पौवाका होटल र रिसोर्टहरूले नेपाली आतिथ्यतालाई विश्वस्तरमा पु¥याउने लक्ष्य राखेका छन्।

अध्यक्ष दुर्गा प्रसाद भण्डारीले भने, “नेपाली कला, संस्कृति, भेषभूषा र खानपिनको प्रवद्र्धनले पर्यटन उद्योगमा ठूलो भूमिका खेल्छ। हरेक चाडपर्वलाई सांस्कृतिक उत्सवको रूपमा मनाउँदै हामी नेपाली आतिथ्यतालाई विश्वसामु चिनाउन प्रयासरत छौं।”

यस वर्षको सराय नाच महोत्सवले केवल सांस्कृतिक मनोरञ्जन मात्र होइन, लुम्बिनी प्रदेशको विविध र समृद्ध सांस्कृतिक पहिचानलाई पनि उजागर गर्ने विश्वास गरिएको छ।