खोज

रोल्पा, २५ मंसिर ।

रोल्पामा तीनवटा स्थानीय तहले आफ्नै प्रहरी भर्ना गरेका छन् । जिल्लाका रोल्पा नगरपालिका, रुन्टीगढी गाउँपालिका र माडी गाउँपालिकाले आफ्नै प्रहरी भर्ना गरेका हुन् ।

रोल्पा नगरपालिका र रुन्टीगढी गाउँपालिकाले नगर प्रहरीको रुपमा प्रहरी भर्ना गरेका छन् भने माडी गाउँपालिकाले गाउँ प्रहरीको रुपमा आफ्नै प्रहरी भर्ना गरेको छ । रोल्पा नगरपालिका जिल्ला सदरमुकाममा रहेको छ भने रुन्टीगढी गाउँपालिका र माडी गाउँपालिका नगरोन्मुख गाउँपालिका हुन् ।

जिल्लामा सवभन्दा पहिला आफ्नै प्रहरी भर्ना गर्ने स्थानीय तह रुन्टीगढी गाउँपालिका हो । रुन्टीगढी गाउँपालिकाले एक महिला सहित ९ जना नगर प्रहरी भर्ना गरेको छ । उसले एक जना प्रमुख नगर प्रहरी र ८ जना नगर प्रहरी पद सिर्जना गरी भर्ना गरेको हो ।

रोल्पा नगरपालिकाले ३ महिला सहित १० जना नगर प्रहरी भर्ना गरेको छ । नगर प्रहरीमा एक प्रहरी हवल्दार रहेका छन् भने ९ जना प्रहरी जवान रहेका छन् । जिल्ला सदरमुकाममा रहेको रोल्पा नगरपालिकाले ट्राफिक व्यवस्थापन, वजार अनुगमन, पर्यटकीय क्षेत्रमा रहेका संरचनाहरुको सुरक्षा लगायतका काममा समेत नगर प्रहरी परिचालन गर्दछ ।

जिल्लाको माडी गाउँपालिकाले गाउँ प्रहरीको नाम दिएर आफ्नै प्रहरी भर्ना गरेको छ । उसले २ महिला सहित ७ जना गाउँ प्रहरी भर्ना गरेको हो । गाउँ प्रहरीमा एक जना प्रहरी सहायक निरीक्षक र ६ जना प्रहरी जवान कार्यरत छन् ।

नगर प्रहरी सुरक्षा र विकास गतिविधिमा परिचालन हँुदै आएको रुन्टीगढी गाउँपालिका अध्यक्ष जनक पुनले जानकारी दिए । “शान्ति सुरक्षालाई चुस्त राख्नका साथै अन्य गतिविधिमा समेत नगर प्रहरीहरु परिचालित हुन्छन”–अध्यक्ष पुनले भने,“गाउँपाािलकाले माओवादी सेनाका लडाकु वसेको क्यान्टोनमेनको सुरक्षामा समेत नगरप्रहरी खटाएको छ ।”

स्थानीय तहले भर्ना गरेका प्रहरीहरुलाई सलामी, पिटी परेड, भिड नियन्त्रण, रेस्क्यू, विपद व्यवस्थान तथा उद्दार र सामान्य हतियार संचालन संवन्धी एक महिना सम्मको तालिम संचालन गरिएको थियो । प्रहरीलाई कार्यालय संचालन, चेन अफ कमाण्ड लगायतका विषयमा समेत तालिम दिईएको थियो ।

राजश्व संकलन, न्यायिक समितिलाई सहयोग, सरसफाई, पर्यटन गाईड र कार्यालय सुरक्षाको लागि उनीहरुलाई परिचालन गर्ने सोच स्थानीय तहहरुको छ । नगर प्रहरीलाई संचार सेट, खुकुरी र लट्ठीको सहायताले सुरक्षा दिने व्यवस्था मिलाइएको छ । स्थानीय तहहरुले भर्ना गरेको प्रहरीको खर्च व्यवस्थापन आन्तरिक श्रोतबाट हँुदै आएको छ । रोल्पामा एक नगरपालिका सहित दश स्थानीय तह रहेका छन् ।