गुल्मी २२ भदौ ।
गुल्मीका स्थानीय सरकार दीर्घकालीन योजना बनाएर विकास गर्ने भन्दा पनि एक अर्काको नक्कल गर्नमा व्यस्त देखिएका छन् । एक स्थानीय सरकारले कुनै नौलो कार्य गरेको पाइए त्यो भन्दा फरक गर्ने भन्दा पनि त्यसैको नक्कल गर्नेमै यहाँका स्थानीय सरकार लागेका छन् ।
गुल्मीमा सबैभन्दा पहिले गत वर्ष छत्रकोट गाउँपालिकाले जिपलाइन निर्माण गरी सञ्चालनमा ल्याएको थियो । छत्रकोटले यही प्रकृतिको संरचना अन्य स्थानीय तहमा निर्माण नगर्न आग्रहसमेत गरेको थियो । छत्रकोटले त्यति भन्दै गर्दा पनि त्यसैको नक्कल गर्दै अन्य स्थानीय सरकारले पनि जिपलाइन निर्माणको कार्य अगाडि बढाएका छन् ।
छत्रकोट गाउँपालिकाको वडानम्वर तीन देवालय मन्दिर परिसरबाट देवी भगवती मन्दिरसम्म एक हजार ८० मिटरको लम्वाइमा जिपलाइन सञ्चालनमा ल्याएको हो । लुम्बिनी प्रदेश र गाउँपालिकाको ८६ लाख ७३ हजार १४४ रुपियाँको संयुक्त लगानीमा सानु सेतीदेवी कन्ट्रक्सन प्रालि काठमाडौँले निर्माणको कार्य सम्पन्न गरी जिपलाइन सञ्चालनमा ल्याएको गाउँपालिकाका अध्यक्ष रामप्रसाद पाण्डेले बताए ।
यस्तै जिल्लाको रेसुङगा नगरपालिकाले पनि जिपलाइन र स्काई साइक्लिङ निर्माणको कार्यलाई अगाडि बढाएको छ । नगरपालिकाका सूचना प्रविधि अधिकृत सुरेश खनालका अनुसार कूल एक करोड २५ लाखको लागतमा उक्त संरचना निर्माण गर्न लागिएको हो ।
जिपलाइन ४२५ मिटर लामो हुनेछ भने स्काई साइकिलिङ १८० मिटर लामो रहने भएको छ । खनाल एन्फ्रा प्रालिले उक्त संरचना निर्माण गर्ने जिम्मा पाएकाले पुस मसान्तसम्म निर्माण सम्पन्न हुने खनालले बताए ।
मदाने गाउँपालिकाको वडा नम्वर ७ भनभनेको रोल्मामा ३२० मिटर लामो जिपलाइन सोही दुरीकै साइक्लिङ निर्माणको कार्य सम्पन्न गरी सञ्चालनमा ल्याएको छ । गाउँपालिकाको लगानीबाट ६५ लाखमा अर्घा कन्ट्रक्सन अर्घाखाँचीले निर्माणको कार्य गरेको गाउँपालिकाले जनाएको छ । यसका साथै उक्त क्षेत्रमा मन्दिर र पार्क निर्माणको कार्य पनि भइरहेको छ ।
यस्तै रुरुक्षेत्र गाउँपालिकाले पनि गुल्मी र स्याङजा जोड्ने गरी जिपलाइन निर्माणका लागि डिपीआरको काम सम्पन्न गरेको छ । रुरुक्षेत्र गाउँपालिकाका अध्यक्ष यदु ज्ञवालीले स्याङजाको कालीगण्डकी गाउँपालिका र रुरुक्षेत्रको साझेदारीमा निर्माण गरिने भएकाले यसको मोडालिटी तयार नभएको बताए । धार्मिक तथा पर्यटकीय क्षेत्र पनि भएकाले रुरुक्षेत्रको समग्र विकासका लागि जिपलाइनले थप टेवा पुग्ने गाउँपालिकाले जनाएको छ ।
नागरिक समाज गुल्मीका अध्यक्ष पदमप्रसाद पाण्डेले सम्भाव्यता अध्ययन नगरी होडबाजीकै रूपमा बनाउने संरचना प्रयोगविहीन हुन नहुने बताए । अहिले होडबाजीकै रूपमा बनाउने संरचना नचल्ने अवस्थामा हुँदा त्यसको जबाफदेही कोही पनि नहुने हुनाले राज्यको लगानी यसै खेर गइरहेको र जाने अवस्था आउने उनको भनाइ छ ।
२३ मंसिर २०८२, मंगलवार
