खोज

सल्यान, १९ भदौ ।

आठ मिटरको चौडा सडक स्तरबृद्धि तथा कालोपत्रेका लागि सल्यानको सिद्धकुमाख गाउँपालिकाले क्षेत्राधिकारभित्र पर्ने सबै अवैध घर, टहरा र अन्य संरचनाहरू हटाउने भएको छ । वडा नं. ५ ढोरचौरदेखि फलाटेसम्मको ८ मिटर चौडा सडक स्तरोन्नति तथा कालोपत्रे आयोजना सञ्चालनमा आउने भएको हो ।

जसका लागि प्रमुख प्रशासकीय अधिकृत दिपेन्द्र कंडेलले १६, भदौमा सूचना जारी गरेर १५ दिनभित्र स्थानीय बासिन्दाहरूलाई आफ्नै पहलमा अवैध संरचना हटाउन आग्रह गरेका छन् ।

कालोपत्रेका लागि दुई करोड ३० लाख रुपैयाँ लागत अनुमान रहेको गाउँपालिकाले जनाएको छ । सडक स्तरबृद्धिका लागि बुधबारदेखि सर्वेको कार्य सुरु भैसकेको छ ।

तोकिएको समय सीमा भित्र अवैध संरचना आफैले नहटाएमा गाउँपालिकाले सम्बन्धित संरचना हटाउने र यस प्रक्रियामा लाग्ने सम्पूर्ण खर्च सम्बन्धित व्यक्तिबाट कानुन अनुसार असुल गरिने जनाएको छ ।

सूचनामा भनिएको छ, “तोकिएको म्यादभित्र पनि अवैध घर टहरा तथा बनेका संरचनाहरू नहटाएमा स्थानीय सरकार सञ्चालन ऐन, २०७४ तथा प्रचलित कानुन बमोजिम गाउँपालिका आफैले घर टहरा तथा बनेका संरचना हटाई जग्गा खाली गर्ने र त्यसरी अवैध घर टहरा तथा बनेका संरचनाहरू खाली गर्दा लागेको खर्चहरू सम्बन्धित व्यक्ति/संस्थाबाट कानुन बमोजिम असुल उपर गरिने छ ।”

सिद्धकुमाख गाउँपालिकाको आर्थिक वर्ष २०८२/८३ को वार्षिक स्वीकृत बजेट र कार्यक्रमअनुसार सडक निर्माण गर्न लागेको हो । सडक स्तरबृद्धि तथा कालोपत्रे भएसँगै त्यस क्षेत्रका बासिन्दाहरूका लागि यातायातमा सहजता, आर्थिक क्रियाकलापमा वृद्धि र समग्र विकासमा योगदान पु¥याउने अपेक्षा गरिएको छ ।

सडक स्तरोन्नति र कालोपत्रे नहुँदा त्यस क्षेत्रमा लामो समयदेखि यात्रु र गाडी सञ्चालनमा कठिनाइ देखिएको छ । अब ८ मिटर चौडाइको फराकिलो सडक निर्माण भएपछि पैदल यात्री, सवारी साधन र व्यापारिक गतिविधिमा सहजता आउने विश्वास गरिएको छ ।