खोज

काठमाडौँ ।

ललितपुरको महालक्ष्मिस्थित मितेरी बचत तथा ऋण सहकारी संस्थामा भएको ठगी प्रकरणमा नेपाली कांग्रेसका उपसभापति धनराज गुरुङकी पूर्वपत्नी ज्योति गुरुङ नै मुख्य संलग्न रहेको तथ्य उजागर भएको छ। प्रहरीको केन्द्रीय अनुसन्धान ब्युरो (सीआईबी) ले अनुसन्धान प्रतिवेदन बुझाएपछि सरकारी वकिल कार्यालयले आइतबार ललितपुर जिल्ला अदालतमा ८ जनाविरुद्ध मुद्दा दर्ता गरेको हो।

१७ करोड बढी ठगीको आरोप

प्रतिवादीहरूमाथि ठगी, लिखत सम्बन्धी कसुर, अभौतिक मुद्रा ऐन, नेपाल राष्ट्र बैंक ऐन २०५८ र संगठित अपराध अन्तर्गत मुद्दा चलाइएको छ। उनीहरूले सहकारीको १४ करोड २९ लाख रुपैयाँभन्दा बढी अपचलन गरेको र कम्बोडियाबाट पार्सलमार्फत रकम पठाउने नाममा थप ठगी गरेर जम्मा १७ करोड ७२ लाख रुपैयाँभन्दा बढी बिगो कायम भएको अभियोग छ।

यस प्रकरणमा बर्दियाका ज्योतिबहादुर भण्डारी, ३४ वर्षीय सुरेश अधिकारी र धादिङका सुवास खत्री पक्राउ परेका छन्। भण्डारीलाई कम्बोडियाबाट पक्राउ गरी नेपाल ल्याइएको हो।
तर, मुख्य आरोपी ज्योति गुरुङ हाल फरार छिन्। अन्य फरारमध्ये सहकारी अध्यक्ष कुम्भराज गुरुङ, खोटाङका विजयकुमार राई, बाग्लुङका प्रितम अधिकारी, र सिन्धुपाल्चोकका अर्जुन आरम रहेका छन्।

ज्योति गुरुङको भूमिका

ज्योति गुरुङ सहकारीमा २०५७ सालमा सहायक कर्मचारीका रूपमा प्रवेश गरेर २०७५ मा महाप्रबन्धकसम्म बनेकी थिइन्। सहकारीको सम्पूर्ण वित्तीय कारोबारमा उनको प्रत्यक्ष अधिकार थियो। अनुसन्धानमा उनीमाथि :

• बचतकर्ताले जम्मा गरेको रकम व्यक्तिगत प्रयोजनमा दुरुपयोग गर्ने,

• मुद्दती बचत कार्ड बनाएर रकम सिस्टममा अद्यावधिक नगरी आफैं चलाउने,

• ऋण लिन आउन दिने, तर फिर्ता रकम पनि सिस्टममा नदेखाई आफैं प्रयोग गर्ने,
  जस्ता काममा संलग्न रहेको प्रमाण फेला परेको छ।

सहकारीका अध्यक्ष, सचिव, सदस्य र कर्मचारीहरूले पनि बयान दिँदै ज्योतिले बचतकर्ता र ऋणीहरूलाई आफ्नै कार्यकक्षमा भेटी कार्ड जारी गर्ने र रकम आफैं बुझ्ने गरेको बताएका छन्।

अनुसन्धानमा ज्योति गुरुङले अपचलन गरेको रकम हुन्डीमार्फत थाइल्यान्ड, सिंगापुरलगायत देशमा पठाउने गरेको खुलेको छ। यस कार्यमा भरत गुरुङ, सुरेश अधिकारी, सुवास कार्की, राकेश नामका भारतीय नागरिक र मामा भन्ने व्यक्तिहरू संलग्न रहेको उल्लेख छ।
त्यसैगरी, ज्योतिबहादुर भण्डारीको कीर्ते राहदानी समेत ज्योतिले बनाइदिएको प्रमाण फेला परेको छ।

क्रिप्टो र हुण्डी कारोबार

धादिङका सुवास खत्री र अर्जुन आरमलाई हुन्डी कारोबारमा समेत प्रतिवादी बनाइएको छ। उनीहरूले ६ अर्ब ७४ करोड रुपैयाँभन्दा बढी हुण्डी कारोबार गरेको अभियोग छ। खत्रीमाथि करिब ३ लाख रुपैयाँ बराबरको क्रिप्टो कारोबार गरेको आरोप पनि लगाइएको छ।

अनुसन्धान प्रतिवेदनअनुसार, ज्योतिले आफ्नै परिवार र नजिकका आफन्तलाई समेत झुक्याएकी थिइन्। आफ्नी सानी आमा कमला गुरुङको रकम समेत अपचलन गरी, “थाइल्यान्डमा व्यवसायमा लगानी गरेको छु” भनेर ढाँटेको तथ्य बाहिर आएको छ। उनले भण्डारीसँग थाइल्यान्डमा साझेदारीमा सिपिङ कम्पनी संचालन गर्ने नाममा रकम पठाएको पनि देखिएको छ।

भण्डारीले बयानमा भनेका छन्, “ज्योतिले सहकारीको रकम हुन्डीमार्फत पठाउने गर्थिन्, लगानी क्रिप्टोमा डुब्यो भनेर मलाई भनेकी थिइन्।”
त्यस्तै, सुरेश अधिकारीले पनि “ज्योतिले भण्डारीलाई ९ करोडभन्दा बढी रकम पठाइसकेकी तर कहिले फिर्ता हुने भन्ने तनावमा रहेको” बताएका छन्।