खोज

बुटवल, २५ साउन ।

रुपन्देहीको तिलोत्तमास्थित डिंगरनगर दूरगामी बहुउद्देश्यीय सहकारी संस्थाका अध्यक्ष, सचिव र व्यवस्थापकविरुद्ध सहकारी ठगीको आरोपमा किटानी जाहेरी परेको छ ।

सहकारीका बचतकर्ताहरुद्वारा गठित छानविन व्यवस्थापन र समन्वय समितिको तर्फबाट इलाका प्रहरी कार्यालय बुटवलमा तीनजनाविरुद्ध किटानी जाहेरी परेको हो । सहकारीका अध्यक्ष घनश्याम तिवारी, सचिव रामबहादुर थापा र व्यवस्थापक वसन्त पराजुलीविरुद्ध किटानी शुक्रबारै किटानी जाहेरी परेको इलाका प्रहरी कार्यालय बुटवलका प्रमुख प्रहरी नायब उपरीक्षक इन्द्रबहादुर रानाले बताए ।

“किटानी जाहेरी परेसँगै अव अनुसनधान अगाडि बढ्छ, अनुसन्धान टुंगिएपछि अभियोजन गर्छौं”–डिएसपी रानाले बुटवल टुडेसँग भने । यसअघि पनि बचतकर्ताले उनीहरुविरुद्ध छानविनको माग गर्दै उजुरी दिएका थिए । अहिलेको उजुरी सहकारी ठगीमा आएकाले अव यसै अनुसार कारवाही अगाडि बढाइने उनले बताए ।

व्यवस्थापक वसन्त पराजुली एक साता प्रहरीको हिरासत बसेर छुटिसकेका छन् भने अध्यक्ष र सचिव विरुद्ध पनि रुपन्देही जिल्ला अदालतले दुई साता अघि नै पक्राउ पुर्जी जारी गरेको थियो । तर उनीहरु अहिलेसम्म पक्राउ नपर्दा बचतकर्ताले राजनीतिक संरक्षणको आशंका गरेका छन् ।

“करोडौं रकम ठगी हुँदा पनि पक्राउ गरेर अनुसन्धानमा नल्याइनु राजनीतिक संरक्षण नभै अरु होइन, दलीय आडमा सहकारी ठगी गर्नेलाई जोगाउने षडयन्त्र भैरहेको छ”–समन्वय समितिका एकजना सदस्यले भने । सहकारीका अध्यक्ष तिवारी र सचिव थापा स्थानीय काँग्रेस नेता हुन् । काँग्रेस नेता भएकैले जोगाउने षडयन्त्र गरिएको बचतकर्ताको आरोप छ ।

उक्त सहकारीबाट १२ करोड हिनामिना र २५ करोड रुपियाँ अपचलन भएको पुष्टी भएको छ । त्यस्तै सहकारीमा नीतिगत अपचलन भने करिव ८५ करोड भएको अडिट रिपोर्टले देखिएको छ ।

सहकारीमा अपचलन भएपछि यसको सत्यतथ्य पत्ता लगाउन ७ जना स्वतन्त्र लेखापरीक्षकहरु खटिएका थिए । उनीहरुले अन्तिम रिपोर्ट तयार गर्दै छानविन विशेष समितिलाई बुझाएको १० दिन नाघिसकेको छ । समितिले उक्त अडिट रिपोर्ट सोही दिन प्रदेश सहकारी रजिष्टार कार्यालयमा बुझाएको थियो ।

अडिट रिपोर्ट अनुसार सहकारीले विभिन्न व्यक्तिका नाममा ३४ करोड ७ लाख ५५ हजार ८१४ रुपियाँ गैरकानुनी  ऋण प्रवाह गर्दा ९ करोड २८ लाख ३० हजार बरारबरको मात्र धितो राखेको छ । यस हिसावले सहकारीको कुल  ऋणमध्ये २१ करोड ७४ लाख ६६ हजार ५४९ रुपियाँ जोखिममा छ ।

त्यस्तै व्यवस्थापक वसन्त पराजुलीले ४ करोड ७० लाख ७६ हजार १२१ रुपियाँ अनियमितता गरेको अडिट रिपोर्टले औंल्याएको छ । पराजुलीसँग उक्त रकमको व्याजसहित ४ करोड ८० लाख ९७ हजार असुल्नुपर्ने देखिएको पनि अडिट रिपोर्टमा उल्लेख छ ।

त्यस्तै सञ्चालक समितिले ८ करोड २७ लाख ३१ हजार ४७६ रुपियाँ अनियमितता गरेको र उक्त रकम समितिले जिम्मा लिनुपर्ने सुझाव पनि अडिट रिपोर्टमा दिइएको छ ।

सहकारीका अध्यक्ष घनश्याम तिवारी र सचिव रामबहादुर थापा क्षेत्री लामो समयदेखि फरार रहेकाले बचतकर्ताहरु अन्यौलमा परेका छन् । उनीहरुले आफूहरुको बचत फिर्ता गर्न माग गर्दै दिनहुँ बैठक र छलफल गरिरहेका छन् ।

यस प्रकरणबारे जानकारीका लागि प्रदेश राजधानीमा रहेको सहकारी दर्ता अधिकारीको कार्यालयका कोही पनि सम्पर्कमा आउन चाहँदैनन् । यसविषयमा आवश्यक जानकारीका लागि सम्पर्क गर्न खोज्दा सहकारी दर्ता अधिकारीको कार्यालयका प्रमुख सुरेशचन्द्र आचार्य र वरिष्ठ अधिकृत बाबुराम पन्थी दुवैले फोन उठाएनन् । यसले सहकारी दर्ता अधिकारीको कार्यालय पनि राजनीतिक दवावमा परेको आशंका गर्नेहरुलाई बल पुगेको छ ।