खोज

गुल्मी,१६ साउन ।

गुल्मीको मदन भण्डारी रागमार्ग नामको मात्रै राजमार्ग भएको छ । राजमार्गको सडकमा खाल्टै खाल्टा र सडकमै पानी जम्मा भएर पोखरी बनेको छ जसकारण दुर्घटना निम्तिने जोखिम पनि बढेको छ ।

गुल्मी जिल्लाको मदन भण्डारी राजमार्ग अन्तर्गत तम्घास–छल्दी सडक खण्ड भत्कीन थालेसँगै र सडकका घुम्तीहरुमै खाडल भएपछि दुर्घटनाको जोखिम बढेको हो ।

उक्त सडक खण्डको नालीमा घाँस र माटो भरिएर सडकमै पानी जम्मा हुँदा थप दुर्घटना बढ्दै गएको त्यस क्षेत्रमा यात्रा गर्ने यात्रुहरुले गुनासो गर्दै आएका छन् ।

राजमार्गका विभिन्न स्थान र घुम्तीहरुमा कतै खाल्डा र कतै पानीका पोखरी जस्तै बन्दा पनि सडक मर्मतमा सरोकारवाला निकायले चासो देखाएको पाइदैन् ।

६ वर्ष पहिले कालोपत्रे भएको तम्घास–सिमलटारी सडक खण्ड अहिले जीर्ण बन्दै गएको छ । समयमै सडक हस्तान्तरण र मर्मत नहुँदा सडक जीर्ण बन्दै गएको हो ।

कालोपत्रे सडकको जोखिम ठाउँमै भत्कीन थालेसँगै राजमार्ग भएर यात्रा गर्ने सवारी साधनहरुले सास्ती खेप्न बाध्य भएका छन् । रातको समय उक्त सडकको यात्रा गर्दा निकै जोखिम मोलेर यात्रा गर्न बाध्य भएको सवारी चालक लोकेन्द्र खत्रीले गुनासो गरे ।

लामो समय बित्दासमेत सडक मर्मत नहुनु दुःखद पक्ष भएको उनले बताए । अटो चालक केशव कुँवरले सडक जीर्ण बन्दै जान थालेपछि साना सवारी सधानहरुलाई समस्या पर्दै गएको दुःखेसो पोखे । राजमार्गमा यात्रा गर्दा घुम्तीहरुमा पनि ठूला सवारी सधानहरुले पेलेर आउदा निकै जोखिम मोल्नु परेको उनको पनि गुनासो छ । राजमार्गको २९ किलोमिटर कालोपत्रे सडक २०७१ मा सुरु भई २०७६ सालमा निमार्ण सम्पन्न भएको थियो ।

मदन भण्डारी राजमार्ग योजना कार्यालय तम्घास गुल्मीले सडकमा सामान्य मर्मतको काम पनि नगर्दा थप जोखिम बढेको सरोकारवालाहरुले गुनासो गर्दै आएका छन ।

सडकको छल्दी लगायतका धेरै ठाउँमा सहायक सडक बिस्तारको क्रममा फालिएको माटोले कालोपत्रे सडक दिनहु जीर्ण बन्दै गएको छ ।

करिब एक अर्बको लागतमा कालोपत्रे गरिएकोमा राजमार्ग भएर गुल्मी क्षेत्र नम्बर–२ का अधिकांश स्थान र छिमेकी जिल्ला बाग्लुङ र प्युठानसम्म सवारी साधान चल्ने गर्दछन् ।
यता मदन भण्डारी राजमार्ग, योजना कार्यालय तम्घास गुल्मीका सूचना अधिकारी इन्जिनियर हुमानाथ पौडेलले सडकका खाल्टा खुल्टीहरु पुर्नका लागि ठेक्का लगाएको बताए । बल्लतल्ल बजेटको ब्यबस्थापन गरी अन्तिम चरणमा ठेक्का लगाएकाले वर्षायाममा काम गर्न नसकिएको उनको भनाइ छ । वर्षायाम सकिए लगत्तै तम्घासदेखि सिमलटारीसम्मका खाल्डाखुल्डीहरु मर्मत गर्ने पौडेलले जानकारी दिए ।