खोज

बागलुङ, ११ साउन ।

नेपालको एकमात्र सिकार आरक्ष क्षेत्र ढोरपाटनमा आन्तरिक पर्यटकको संख्या हरेक वर्ष उल्लेखनीय रूपमा बढ्दै गएको छ। ढोरपाटन सिकार आरक्ष कार्यालयका अनुसार आर्थिक वर्ष २०८१/८२ मा पर्यटक संख्या अघिल्लो वर्षको तुलनामा झन्डै ८ हजारले वृद्धि भएको छ।

आर्थिक वर्ष २०८०/८१ मा १५ हजार ५ सय ७३ जना पर्यटक ढोरपाटन पुगेका थिए भने २०८१/८२ मा यो संख्या बढेर २३ हजार ६ सय ९२ पुगेको छ। तीमध्ये १२ जना सार्क राष्ट्रका नागरिक र २ सय १३ जना अन्य विदेशी पर्यटक रहेका छन्, बाँकी सबै आन्तरिक पर्यटक रहेको आरक्षका रेञ्जर सागर सुवेदीले जानकारी दिए ।

प्रचारप्रसार, पर्यटकीय पूर्वाधारमा भएको सुधार, तथा बुकी र जलजलाजस्ता गन्तव्यमा पदयात्रा गर्ने आकर्षणले गर्दा आन्तरिक पर्यटकको चाप बर्सेनि बढेको सुवेदीको भनाइ छ।
पर्यटक संख्याको वृद्धिसँगै प्रवेश शुल्कबाट संकलित राजस्वसमेत उल्लेखनीय रुपमा बढेको छ। नेपाली पर्यटकले एक सय रुपैयाँ प्रवेश शुल्क तिर्नुपर्ने व्यवस्था छ । गत आर्थिक वर्षमा मात्र प्रवेश शुल्कबाट २० लाख रुपैयाँभन्दा बढी राजस्व संकलन भएको आरक्ष कार्यालयले जनाएको छ।

पहिले विदेशी पर्यटक ढोरपाटनमा मुख्यतः सिकारका लागि मात्रै आउने गर्थे। तर पछिल्ला वर्षहरूमा सिकार आरक्ष क्षेत्रको अवलोकन, ढोरपाटन उपत्यका, निशेलढोर, ढोरबराह मन्दिर, बुकीपाटन र जलजला क्षेत्रको भ्रमण गर्न आन्तरिक पर्यटकको संख्यामा उल्लेखनीय वृद्धि भएको छ।

समुन्द्री सतहदेखि करिब २ हजार ९ सय  मिटरको ढोरपाटन उपत्यकादेखि ४ हजार  मिटरभन्दा माथिको बुकीपाटनसम्म पर्यटक पुग्न थालेका छन् ।