खोज

गुल्मी, ५ साउन ।

लुम्बिनी प्रदेशका कृषि भूमी तथा सहकारी मन्त्री दिनेश पन्थीले आफूसँग समन्वय नगरी योजना कार्यान्वयन नगर्न गुल्मीमा पत्राचार गरेका छन् ।

गुल्मी क्षेत्र नम्वर दुइको दुुइका प्रदेस सभा सदस्य तथा मन्त्री पन्थीको सचिवालयद्वारा आफ्नो निर्वाचन क्षेत्रका योजनाहरु कार्यान्वयन गर्दा आफूसँग समन्वय गरेर मात्र कार्यन्वयन गर्नका लागि पत्र आएको सडक पूर्वाधार विकास कार्यालय गुल्मीले जनाएको छ ।

सडक पूर्वाधार विकास कार्यालयका प्रमुख इन्जिनियर सच्चिधानन्द चौधरीका अनुसार माननीय मन्त्री ज्यूको आदेस अनुसार मन्त्रीको सचिवालमार्फत शाखा अधिकृत नारायण घर्तीद्वारा हस्ताक्षर भएको पत्रमा त्यस क्षेत्रका योजनाहरु कार्यान्वयन गर्दा मन्त्री ज्यूसँग समन्वय गरेर मात्र कार्यान्वयन गर्नका लागि पत्र आएको बताए ।

कार्यालयमा पत्र आएकाले त्यसलाई दर्ता गरिएको र मन्त्री ज्यूकै आदेस आएपछि कार्यान्वयन गर्नु आफूहरुको दायित्व भएको उनको भनाइ छ । पत्र नलेखी मौखिक रुपमै भनेको भए पनि राम्रो हुने भन्दै आधिकारीक पत्र नै आएपछि कार्यान्वयन गर्नुवाहेकको विकल्प नरहेको चौधरीले बताए । चालु आर्थिक वर्षमा मन्त्री ज्यूको निर्वाचन क्षेत्रमा करिव २० वटा जति योजनाहरु रहेका छन् ।

नागरिक समाज गुल्मीका अध्यक्ष पदमप्रसाद पाण्डेले योजना कार्यन्वयनमा समन्वय आवश्यक भए पनि पत्र काटेर उर्दीजारी गरेजस्तु गर्नु उपयुक्त नभएको टिप्पणी गरेका छन् । जो कोहीले आफनो हैसियत विर्सेजस्तो गर्न नहुँने र मन्त्रीको गरिमा पनि कायम गर्दा राम्रो हुने उनको भनाइ छ ।

कृषि भूमी तथा सहकारी मन्त्री दिनेस पन्थीसँग यस बारेमा बुझनका लागि पटक पटक फोन सम्पर्क गर्दा सम्पर्क हुन सकेन भने अन्य कर्मचारीहरुले प्रतिक्रिया दिन उपयुक्त नहुने बताउँदै आएका छन् ।