खोज

गुल्मी, १ साउन ।

गुल्मीको सदरमुकाम तम्घास, तम्घासको मुटु चिदीचौर । सरकारी कार्यालयको नजिकै चिदिचौर खेल मैदान । उक्त मैदानमा अहिले पानी जम्मा गर्ने स्थलको रुपमा परिणत भएको छ । पानी पर्दा पानी जम्मा भएर जोखिम भएको छ भने नपर्दा पनि खाडल भएर जोखिम बढेको छ ।

प्रत्येक दिन त्यहाँ खेल खेल्ने र साँझपख फ्रेस हुनका लागि जाने स्थानमा अहिले पानी जम्मा भएर पोखरी जस्तै बनेको छ । यहाँ साँझपख फ्रेस हुन आमा बाबुहरुसँगै आउने बालबच्चाहरु उक्त पोखरीमा परेर दुर्घटना हुन सक्ने जोखिम बढेको छ । यस स्थानको पोखरीमा अहिले बालबालिकाहरु आमाबाबुको आँखा छलेर खेल्नेसमेत गरेका छन् ।

चिदीचौरलाई अहिले पोखरी जस्तै बनाएर दुर्घटना निम्त्याउने स्थलका रुपमा परिणत गर्नु दुःखद पक्ष भएको उक्त खेल मैदानमा नानीबाबु लिएर आएका प्रकास घर्तीले दुखेसो गरे । कोठामा बालबच्चालाई राखिराख्नु भन्दा साँझपख बाहिरको वातावरणसँग घुलमिल गराउन यहाँ ल्याउँदा पछिल्लो समय झन दुर्घटनाको जोखिम बढेको उनको भनाइ छ । राम्रो बनाउने नाममा यसलाई ब्यवस्थापन गर्न नसक्नुका साथै समयमा काम नगरी असारे विकासमा जोड दिनाले पनि जोखिम बढेको खेल मैदानमा आएकाहरुको गुनासो रहेको छ ।

नागरिक समाज गुल्मीका अध्यक्ष पदमप्रसाद पाण्डेले उक्त स्थानमा के हुँदै छ भनेर आम नागरिकलाई जानकारी दिनका लागि सूचना पार्टी पनि नराखिनु र दुर्घटना निम्त्याउने गरी खाडल खनेर छाड्नु दुःखद पक्ष भएको टिप्पणी गरे । समयमै काम नगर्नु र सरोकारवालाहरुको उदासिनताले थप दुर्घटना निम्त्याउन सक्ने भएकाले समयमै ब्यवस्थापन गर्न लाग्नुपर्नेमा उनले जोड दिए ।

रेसुंगा नगरपालिकाका योजना अधिकृत विनोद मरासिनीका अनुसार यस चौरको एक भागमा पानी उम्रिने भएकाले यसलाई अन्डरग्राउण्ड गरि ब्यवस्थापन गर्ने कार्य अगाडि बढाइएको बताए । जमिनमुनीबाट पाइप लगाएर ब्यबस्थापन गर्ने र बाहिरबाट मलिलो माटो ल्याई दुवो लगाउने कार्य हुने भएकाले नगरपालिकाको समन्वय मात्रै रहने उनको भनाइ छ । सबै कार्य सामाजिक विकास डिभिजन कार्यालय पाल्पाबाट हुने भएकाले आफूहरुले सहजिकरण मात्रै गर्दै आएको उनले बताए ।

यता सामाजिक विकास डिभिजन कार्यालय पाल्पाका इन्जिनियर विकास कुँवरका अनुसार बहुवर्षे ठेक्का अन्र्तगत एक करोडको लगानीमा रामेछाप कन्ट्रक्सन काठमाडौले काम गरिरहेको बताए । अहिले उक्त स्थानमा पोखरी जस्तै भएको आफूले जानकारी पाएको बताउँदै तत्काल पाइपहरु ल्याएर ब्यवस्थापन गर्नका लागि निर्माण ब्यवसायीलाई अनुरोध गरेको उनको भनाइ छ । पहिलो चरणमा निर्माण ब्यवसायीले पाइपहरु ल्याएर अन्डर ग्राउण्ड गर्ने बताएकोले केही स्वरुप परिवर्तन हुने कुँवरले बताए ।