काठमाडौं ।
एसीसी पुरुष यू-१६ इष्ट जोन कप क्रिकेटको उपाधिका लागि अब नेपाल र सिंगापुर आमनेसामने हुने भएका छन्। बिहीबार सम्पन्न दुवै सेमिफाइनल खेलपछि प्रतियोगिताको फाइनल समीकरण तय भएको हो।
पहिलो सेमिफाइनलमा नेपालले साविक उपविजेता मलेसियामाथि सानदार जित निकाल्दै चौथो पटक उपाधि नजिक पुगेको छ। मलेसियाले दिएको ९१ रनको सामान्य लक्ष्य नेपाली टोलीले मात्र ११.४ ओभरमा १ विकेटको क्षतिमा सजिलै भेट्टायो।
त्यसैगरी, दोस्रो सेमिफाइनलमा सिंगापुरले हङकङलाई ४ विकेटले पराजित गर्दै फाइनलमा नेपालको सामना गर्न पाउने भएको हो। हङकङले दिएको १६९ रनको लक्ष्य सिंगापुरले ३८.५ ओभरमा ६ विकेट गुमाएर भेट्टाएको हो। यसअघि ब्याटिङ गरेको हङकङ ४३ ओभरमा १६८ रनमै अलआउट भएको थियो।
समूह चरणमै नेपालसँग पराजित भएको सिंगापुरले उपविजेताका रूपमा सेमिफाइनलमा स्थान बनाएको थियो। नेपाल भने समूह ए को विजेता बन्दै अन्तिम चारमा पुगेको थियो। फाइनलमा पुनः यी दुई टोलीको प्रतिस्पर्धा हुँदैछ — जहाँ नेपाल सिंगापुरविरुद्ध लगातार दोस्रो जितको खोजीमा रहनेछ।
प्रतियोगिताको उपाधिका लागि हुने यो खेल दुबै टोलीका लागि प्रतिष्ठाको लडाइँ हुनेछ। नेपालको युवा टोली उच्च मनोबलका साथ मैदान उत्रिने अपेक्षा गरिएको छ, भने सिंगापुर पुनः हारको बदला लिने लक्ष्यसहित उत्रने निश्चित छ।
