खोज

 काठमाडौं ।

एसीसी मेन्स यू–१६ इस्ट जोन क्रिकेटअन्तर्गत आफ्नो तेस्रो खेलमा नेपालले ओपनिङ ब्याटर प्रसिद्ध जैसीको शतक र कप्तान बिपिन प्रसाद शर्माको ६ विकेटको उत्कृष्ट प्रदर्शनमा इन्डोनेसियामाथि ३७० रनको विशाल अन्तरले जीत निकालेको छ।

क्वालालम्पुरस्थित सेलांगर टर्फ क्लबमा टस हारेर पहिले ब्याटिङ गरेको नेपालले ५० ओभरमा ५ विकेटको क्षतिमा ४२० रन बनायो। यो नेपालले उमेर समूहदेखि सीनियर टोलीसम्म ५० ओभरको क्रिकेटमा बनाएको अहिलेसम्मकै सबैभन्दा ठूलो योगफल हो।

नेपालले दिएको ४२१ रनको विशाल लक्ष्य पछ्याउँदै इन्डोनेसियाली टोली २४.३ ओभरमा मात्र ५० रनमा समेटियो। बिपिन शर्माले ७.३ ओभरमा १२ रन खर्चिएर ६ विकेट लिँदै बलिङतर्फको कमान सम्हाले। शुभम खनाल र सुगम बुढाथोकीले १–१ विकेट लिए।

ब्याटिङमा ओपनर प्रसिद्ध जैसीले ११४ बलमा १५ चौका र १ छक्का सहित १३२ रनको शानदार पारी खेले। अर्का ओपनर परिमार्जन यादवले २८ बलमै ७१ रन बनाए, जसमा ४ चौका र ८ छक्का समावेश थिए। रौनक श्रीवास्तवले ७१ बलमा ८ चौका र २ छक्कासहित ८८ रन बनाए भने जोय थापाले ४१ बलमा ५७ रनको योगदान दिए।

पहिलो विकेटका लागि जैसी र यादवले १३० रनको साझेदारी गरे। दोस्रो विकेट १५१ रनमा खसेको थियो भने तेस्रो विकेटका लागि जैसी र रौनकबीच १४८ रनको महत्वपूर्ण साझेदारी बन्यो।

इन्डोनेसियाका बलरमध्ये केतुत दर्मा पुत्राले २ विकेट लिए भने काभिन नीरज, महेन्द्रा आजी र रेहान रिजाले समान रूपमा १–१ विकेट लिए।

समूह ‘ए’ मा नेपालले हालसम्म खेलेका तीनवटै खेल जित्दै ६ अंकसहित शीर्ष स्थानमा छ। पहिलो खेलमा सिंगापुरलाई ६ विकेटले र दोस्रो खेलमा जापानलाई ९ विकेटले हराएको नेपालले अब अन्तिम लिग खेल भुटानसँग खेल्नेछ। समूहका शीर्ष दुई टोलीले सेमिफाइनलमा स्थान बनाउने छन्।