खोज

बुटवल, ९ मंसिर ।

तीन पटक सम्म चुनाव जितेका नेपाली काग्रेसका भरत कुमार शाहलाई फराकिलो मन्तरले हराउदै रुपन्देही ५ मा नेकपा एमालेका नेता बासुदेव घिमिरे विजयी भएका छन् । रुपन्देहीको तिलोत्तमा नगरपालिकालाई देशकै नमुना नगरको रुपमा पहिचान दिलाउन सफल भएका घिमिरले आफ्नो क्षेत्र भन्दा पनि पश्चिम चुनौतिको रुपमा रहेको निर्वाचन क्षेत्रमा गएर लोकप्रिय मत सहित विजयी यात्रा सुरुवात गरेका हुन् ।

उनले काँग्रेस नेता शाहलाई ९ हजार ७०२ मतको अन्तरले हराएका हुन् । एमालेका घिमिरेले ३६ हजार ८२२ मत ल्याउँदा शाहले २७ हजार १२० मत प्राप्त गरे । शाह यसअघिका तीनवटा निर्वाचनमा सोही क्षेत्रबाट सांसद चुनिएका थिए ।

सफल मेयरको रुपमा पहिचान बनाएका उनलाई चुनाव भन्दा पहिला प्रदेश सांसदको रुपमा समेत आउने हेरिएको थियो । पार्टीभित्रको आन्तरिक द्वन्द्वका बीचमा राष्ट्रिय सभाका प्रमुख सचेतक खिमलाल भट्टराईले समेत सोही क्षेत्रबाट उम्मेद्वारी दिएका थिए । यद्यपि उनले निर्वाचन आयोगको नियम भन्दा बाहिर उम्मेदवारी दिएपछि वासुदेव घिमिरेको उम्मेद्वारी पहिले दर्ता भएकै कारण आधिकारिता रहेको थियो ।

खिमलाल खेमाका कतिपय व्यक्तिहरुले असहयोग गरेको आरोप लागेकै बेला घिमिरेले कडा मिहिनेत, जनताको साथ सहित लोकप्रिय मत सहित विजयी भएका हुन् । यसैबीच रुपन्देहीको प्रतिनिधि सभा निर्वाचन क्षेत्र नम्बर ५ मा जित निकालेका नेकपा एमालेका वासुदेव घिमिरे तथा प्रदेशसभा १ मा विजेता एमालेकै भूमिश्वर ढकालको विजयी ¥याली निकालिएको छ । सैनामैना नगरपालिका वडा नं. ६ स्थित कलौनीबाट निस्किएको ¥याली निर्वाचन क्षेत्रका चोकचोकमा पुगेको थियो ।

स्थानीय बासिन्दाले विजयी उम्मेदवारहरुलाई अबिर माला लगाएर भव्य स्वागत गरेका थिए ।
रुपन्देहीको क्षेत्र नम्बर ५ को प्रदेशसभा १ मा एमालेका भूमिश्वर ढकालले १९ हजार ७८ मत ल्याएका छन् । उनका निकटतम् उम्मेदवार माओवादी केन्द्रका विनोद पहाडीले ११ हजार ३ सय ६८ मत ल्याएका थिए । जनमत पार्टीका अनुरागनाथ शुक्लको ८ हजार ७ सय ३८ मत छ । ढकाल यसअघि पनि प्रदेश सभा सदस्यमा निर्वाचित भएका थिए ।

को हुन घिमिरे ?

प्रतिनिधिसभा सदस्य पदमा रुपन्देही क्षेत्र नं. ५ बाट विजयी भएका वासुदेव घिमिरे रुपन्देहीको तिलोत्तमा नगरपालिकाको निवर्तमान नगर प्रमुख हुन् । नयाँ नगरपालिका भएर पनि उनको नेतृत्वमा भएका कामका कारण तिलोत्तमा मुलुककैं उत्कृष्ट नगरपालिकाको रूपमा स्थापित छ । तिलोत्तमा नगरपालिका वडा नं. ४ स्थायी ठेगाना भएका घिमिरेको जन्म वि.सं. २०२५ असार २६ गते गुल्मीको बडागाऊँ (हाल मुसिकोट नगरपालिका) मा भएको हो । बुबा स्व. छायादत्त र आमा भीमादेवीको कोखबाट जन्मिएका चार भाई मध्ये वासुदेव साइँला हुन । उनका तीन दिदीबहिनी छन् ।

सुरुवाती शिक्षादिक्षा गुल्मीको मैदान स्थित पृथ्वी माविमा भएको थियो । घिमिरे परिवार वि.सं. २०४० सालमा रुपन्देहीको शंकरनगर ड्राइभरटोलमा बसाईसराई गरेपछि उनले शान्ति माविमा पढेर एसएलसी सोही विद्यालयबाट उत्तीर्ण गरेका हुन् । बुटवलको वाणिज्य क्याम्पसबाट स्नातक तहको औपचारिक अध्ययन पूरा गरेका उनी शान्ति घिमिरेसँग बैवाहिक लगनगाँठोमा बाँधिएका बासुदेवका दुई छोरी र एक छोरा छन् । ममतामयी माता भीमादेवी ९२ वर्षीया छिन् ।

बासुदेव राजनीतिक यात्रामा २०४४ सालबाट जोडिएका हुन् । २०४८ मा नेकपा एमालेको पार्टी सदस्यता प्राप्त गरेका घिमिरेले पार्टीको साविक शंकरनगर गाउँ कमिटी सचिव भएर दुई कार्यकाल पूरा गरेका थिए । ईलाका सचिव हुँदै क्षेत्रीय अध्यक्ष तथा रुपन्देही जिल्ला कमिटीमा तीन कार्यकाल सदस्य भएर काम गरेको अनुभव छ । हाल उनी पार्टीको प्रदेश कमिटी सदस्य तथा केन्द्रीय स्थानीय तह विभाग सदस्य छन् । । युवा संघको गाउँ कमिटी हुँदै दुई पटक जिल्ला अध्यक्ष बनेका घिमिरे एक कार्यकाल केन्द्रीय सदस्यको भूमिकामा रहेर काम गरेका थिए ।

विभिन्न संघ–संस्थाहरुको कुशल व्यवस्थापन गरेको अनुभव समेत उनीसँग छ । दुई कार्यकाल तत्कालीन मिसन डेभलपमेन्ट बैंकको अध्यक्ष, विभिन्न कलेज तथा विद्यालयहरुको अध्यक्ष रहेका घिमिरेलाई सरकारी कार्यालय तथा विभिन्न आयोजनामा काम गरेको अनुभव समेत छ । घिमिरे श्रमप्रति उच्च सम्मान र विश्वास गर्दछन् । सरलता, सबैलाई मिलाएर लैजान सक्ने, निर्णय क्षमता निपूर्णता उनका विशेषता हुन् ।

घिमिरेले चीन, स्वीटजरलेण्ड, फ्रान्स, जर्मन, कोरिया, नेदरलेण्ड, सिंगापुर, मलेसिया, थाइलेण्डलगायतका विभिन्न २० मुलुक भ्रमण गरेका छन् । पाँच वर्षमा घिमिरेको नेतृत्वमा तिलोत्तमामा भौतिक पूर्वाधार, शिक्षा, स्वास्थ्य, वातावरण, सामाजिक रुपान्तरणको क्षेत्रमा थुप्रैं रचनात्मक कामहरु भए । तिलोत्तमाले गरेका कतिपय काम राष्ट्रिय रुपमैं चर्चामा मात्र रहेनन्, अन्य पालिकाहरुको लागि सिकाई समेत बन्दै आएका छन् ।