खोज

काठमाडौँ ।

अष्ट्रेलियन क्रिकेटका स्टार अलराउण्डर ग्लेन म्याक्सवेलले एक दिवसीय अन्तर्राष्ट्रिय  क्रिकेटबाट सन्यास लिएका छन्। सोमबार “फाइनल वर्ल्ड पोडकास्ट” मा अन्तर्वार्ता दिँदै उनले आफ्नो निर्णय सार्वजनिक गरेका हुन्।

दुई पटकको विश्वकप विजेता यो धाकधाले खेलाडीले भने, “शरीरले साथ नदिँदा टिमलाई पनि निराश बनाएको महसुस हुन थाल्यो।” सन् २०२२ मा खुट्टा भाँचिएपछि पूर्ण रूपमा पुनः फर्कन कठिन भएको उनी बताउँछन्। यिनै कारणले गर्दा सन् २०२७ को विश्वकपसम्म कुर्नुको सट्टा अहिले नै बिदा लिन उपयुक्त ठानेको उनको भनाइ छ।

म्याक्सवेलले यद्यपि टी–२० फर्म्याटमा भने अझै अष्ट्रेलियाको तर्फबाट खेल्नेछन्। आगामी वर्ष आयोजना हुने टी–२० विश्वकपमा सहभागी हुने योजना उनीसँग छ।

एक दिवसीय क्रिकेटमा १४९ खेल खेलिसकेका म्याक्सवेलले ३९९० रन बनाएका छन्, जसमा उनको स्ट्राइक रेट ३३.८१ रहेको छ। उनले ७७ विकेट पनि लिएका छन्। उनका केही इनिङ्सहरू असाधारण रहेका छन्—विशेषगरी सन् २०२३ को विश्वकपमा अफगानिस्तानविरुद्धको दोहोरो शतक, जसले संकटमा परेको अष्ट्रेलियालाई जितको डोरीमा तान्यो।

त्यस्तै, उनले सन् २०२३ मा नेदरल्यान्डविरुद्ध ४० बलमै शतक बनाउँदै एक दिवसीय विश्वकप इतिहासको सबैभन्दा छिटो शतकको रेकर्ड पनि बनाएका थिए।

२०१२ मा डेब्यु गरेका म्याक्सवेलले सन् २०१५ र २०२३ मा अष्ट्रेलियालाई एक दिवसीय विश्वकप जिताउन महत्वपूर्ण भूमिका खेलेका थिए। टेष्ट क्रिकेटबाट भने उनले औपचारिक सन्यास लिएका छैनन्, तर रेड बल क्रिकेटमा पुनरागमनको सम्भावना न्यून देखिन्छ।

एकदिवसीय क्रिकेटमा एउटा बहुप्रभावशाली अध्याय बन्द गर्दै म्याक्सवेलले अब आफ्नो ध्यान छोटो फर्म्याटतर्फ केन्द्रित गर्नेछन्, जहाँ उनले अझै केही जादुमयी क्षणहरू क्रिकेटप्रेमीलाई दिने आशा गर्न सकिन्छ।