सामग्री खोज्नुहोस्

काठमाडौं । नेकपा संयोजक पुष्पकमल दाहाल ‘प्रचण्ड’ र एमाले अध्यक्ष केपी शर्मा ओलीबीच प्रदेश सरकार गठन तथा सञ्चालनका विषयमा भएको तीनबुँदे लिखित सहमतिपछि पार्टीभित्र असन्तुष्टि देखिएको दाबी गरिएको छ। केही सञ्चारमाध्यमले स्रोतलाई उद्धृत गर्दै विशेषगरी सहसंयोजक माधवकुमार नेपाल उक्त सहमतिप्रति असन्तुष्ट रहेको उल्लेख गरेका छन्।

समाचारअनुसार ओलीसँगको भेटअघि प्रचण्डले माधव नेपाललाई तत्काल कुनै ठोस सहमति नहुने, केवल राजनीतिक छलफल मात्र हुने बताएका थिए। तर त्यसपछि प्रदेश सरकारको नेतृत्व र सत्ता साझेदारीसम्बन्धी लिखित सहमति भएपछि नेपाल पक्षले त्यसप्रति असन्तुष्टि जनाएको दाबी गरिएको छ।नेपालनिकट एक नेतालाई उद्धृत गर्दै प्रकाशित समाचारमा कांग्रेससँग थप संवाद गरेर सहमतिको प्रयास गर्नुपर्ने धारणा रहे पनि प्रचण्डले हतारमा एमालेसँग सहमति गरेको भन्दै असन्तोष व्यक्त गरिएको उल्लेख छ।

यस्तै, पार्टीभित्रका केही नेता, माओवादी तथा पूर्वएकीकृत समाजवादी पृष्ठभूमिका नेताहरू पनि उक्त सहमतिप्रति सन्तुष्ट नरहेको दाबी गरिएको छ। नेकपा युवा नेता नरेश शाहीले समेत पार्टी कमिटीको औपचारिक निर्णयबिना भएको सहमतिलाई व्यक्तिगत तहको सहमति भएको टिप्पणी गर्दै सार्वजनिक रूपमा असन्तुष्टि जनाएका छन । उनले साउन ८ गते आयोजित एक कार्यक्रममा प्रचण्डले सरकार बनाउने–गिराउने खेलमा पुनः लागे सबै राजनीतिक शक्तिहरू कमजोर बन्न सक्ने चेतावनी दिएको स्मरण गराउँदै त्यसको भोलिपल्ट नै एमालेसँग प्रदेश सरकारको नयाँ समीकरणबारे लिखित सहमति भएको विषयलाई लिएर प्रश्न उठाएको छ।

तीनबुँदे सहमतिअनुसार कोशी, बागमती र लुम्बिनी प्रदेशको नेतृत्व एमालेले, कर्णाली र सुदूरपश्चिमको नेतृत्व नेकपाले गर्ने तथा मधेस र गण्डकी प्रदेशमा अन्य दलसँग परामर्श गरेर नेतृत्व र सहभागिताको स्वरूप तय गर्ने समझदारी भएको बताइएको छ। यद्यपि, पार्टीभित्र असन्तुष्टि रहेको दाबीबारे माधवकुमार नेपाल, प्रचण्ड वा सम्बन्धित दलहरूले औपचारिक रूपमा पुष्टि वा खण्डन गरेका छन् भन्ने स्पष्ट जानकारी सार्वजनिक भएको छैन। त्यसैले यी विवरणहरू सञ्चारमाध्यमले स्रोतका आधारमा गरेको दाबीका रूपमा बुझ्नुपर्ने हुन्छ।