खोज

बुटवल। नेपाली मौलिक कला, संस्कृति, स्वाद र पहिचानको सम्मान गर्दै आन्तरिक पर्यटन प्रवद्र्धन, विकास र रोजगारी सृजना गर्ने उद्देश्यसहित आयोजना गरिएको बुटवल सडक खाना महोत्सव–२०८२ सुरु भएको छ ।

महोत्सवको उद्घाटन गर्दै बुटवल उपमहानगरपालिकाका नगरप्रमुख खेलराज पाण्डेयले रात्रीकालीन बजारमार्फत शहरलाई थप गुलजार बनाउन सबैको सहकार्य आवश्यक रहेको बताए ।

उनले कालिका पथलाई बुटवलको ‘सपनाको पथ’ र व्यवसायिक सम्भावना बोकेको क्षेत्रका रूपमा विकास गर्न पालिका प्रतिबद्ध रहेको उल्लेख गरे । जातीय तथा सांस्कृतिक पहिचान झल्कने कार्यक्रमलाई संघ–संस्थासँग सहकार्य गर्दै अघि बढाइने पनि उनले बताए । यसैगरि उद्घाटन अघि निकालिएको ¥यालीमा नेवा समाज अर्घाखाँची–रुपन्देही प्रथम हुँदै नगद १५ हजार रुपैयाँ र प्रमाणपत्र प्राप्त गर्न सफल भएको छ।

यसैगरि उचडिहवा स्वावलम्बन समूह दोस्रो हुदै नगद १० हजार र राष्ट्रिय लोकभजन तेस्रो हुदै नगद ७ हजार, प्रमाणपत्रबाट पुरस्कृत भए । बुद्ध टोल विकास संस्था, पशुपति टोल विकास संस्था, मनकामना, समावेशी, मिलनटोल, तिनाउ टोल तथा स्ववलम्बन महिला रोजगार क्षेत्री महिला दीदीबहिनी समूह गरी ६ टिमलाई सान्त्वना पुरस्कार नगद ५ हजार प्रदान गरिएको थियो ।

कार्यक्रममा संघका अध्यक्ष माधव कुमार खनालले पर्यटन विकासमा सरकार उदार हुनुपर्ने बताए । नीजि क्षेत्रमा लगानी गरिएको सेवा उद्योगलाई प्रवद्र्धन हुनेगरि कार्यक्रमहरु ल्याउन समेत सरकारसंग आग्रह गरे । कार्यक्रममा बुटवल उद्योग संघ रुपन्देहीका अध्यक्ष हरि अर्यालले पर्यटन गन्तव्यको बजारीकरणमा यस्ता मेलामहोत्सव प्रभावकारी हुने बताए ।

होटल एशोसिएसन नेपालका सदस्य गोपाल रानाले पर्यटनले युवालाई स्वरोजगार र आर्थिक समृद्धि दिलाउने उल्लेख गर्दै कालिका पथलाई रात्रिकालीन बजारका रूपमा विकास गर्न सरकारको साथ आवश्यक रहेको बताए । भारतको उत्तर प्रदेशबाट सानो प्रतिशत पर्यटक भित्र्याउन सके पनि राष्ट्रिय अर्थतन्त्रलाई ठूलो फाइदा पुग्ने उनले बताए ।

कार्यक्रममा संघका सल्लाहकार माधव नेपालले सडक महोत्सवका लागि स्थायी स्थल तोकिदिन स्थानीय सरकारसँग आग्रह गरे । र्‍याली संयोजक एकदेव पाण्डे (सुरज) का अनुसार सहभागीहरूले मौलिक सांस्कृतिक पहिचान झल्कने पोसाक, अनुशासन, झाँकी, ब्यानर र प्लेकार्डसहित सहभागिता जनाएका थिए । महोत्सवमा निकालिएको रयालीमा १३ वटा संघ–संस्था तथा समाज सहभागिता रहेको संघका महासचिव केशवराज कंडेलले बताए ।