जितपुर, ११ पुस ।
राष्ट्रिय स्वतन्त्र पार्टी (रास्वपा) कपिलवस्तु जिल्लाको बाणगंगा नगरपालिका वडा नं. ९ भलवाडको प्रथम वडा अधिवेशन भव्य रूपमा सम्पन्न भएको छ । अधिवेशनले नमराज गुरुङको अध्यक्षतामा नयाँ वडा कार्यसमिति सर्वसम्मत रूपमा चयन गरेको छ ।अधिवेशनबाट उपसभापतिमा योगेन्द्र पौडेल चयन भएका छन् भने सचिवमा पूर्णिमा थारू राना र सह–सचिवमा मित्रलाल पौडेल निर्वाचित भएका छन् । त्यसैगरी, कार्यसमिति सदस्यहरूमा सादन केसी, सोनु बञ्जाडे, अन्नु परियार, सिता अधिकारी, मधु राना तथा शान्ती खड्का गुरुङ चयन भएका छन् ।
कार्यक्रममा पार्टीका जिल्ला तथा नगर तहका नेताहरू, शुभेच्छुक, कार्यकर्ता र स्थानीय नागरिकहरूको उल्लेखनीय उपस्थिति रहेको थियो । अधिवेशनमा बोल्ने वक्ताहरूले राष्ट्रिय स्वतन्त्र पार्टीलाई वडा तहबाटै मजबुत बनाउँदै सुशासन, पारदर्शिता, जवाफदेहिता र जनमुखी राजनीतिलाई संस्थागत गर्ने प्रतिबद्धता व्यक्त गरेका थिए ।
वक्ताहरूले परम्परागत राजनीतिक संस्कारबाट माथि उठ्दै जनताको वास्तविक समस्या र आवश्यकतालाई केन्द्रमा राखेर काम गर्नुपर्नेमा जोड दिए । साथै, संगठन विस्तार, युवाको सक्रिय सहभागिता, नागरिकसँग प्रत्यक्ष संवाद र जनविश्वास जित्दै अघि बढ्ने रणनीतिबारे पनि छलफल गरिएको जनाइएको छ ।
नव–निर्वाचित अध्यक्ष नमराज गुरुङले पार्टीले उठाएका मूल्य र मान्यतालाई व्यवहारमा उतार्दै वडाभित्र सकारात्मक परिवर्तन ल्याउने प्रतिबद्धता व्यक्त गरेका थिए । उनले सबै कार्यकर्तालाई एकताबद्ध भएर जनताको सेवामा लाग्न आग्रहसमेत गरेका थिए ।
अधिवेशनले नवगठित वडा कार्यसमितिलाई सफल कार्यकालको शुभकामना व्यक्त गर्दै पार्टीको नीति, सिद्धान्त र उद्देश्य अनुरूप क्रियाशील रहन निर्देशन दिएको छ ।
१२ पुष २०८२, शनिबार
