खोज

काठमाडौँ ।

पदाधिकारीमा पराजित भएका एमाले नेता विष्णु रिमालले आफ्नो हार स्वाभाविक भएको बताएका छन् । शुक्रबार सामाजिक सञ्जालमा उनले हारपछि पार्टीमा आफ्नो औपचारिक भूमिका परिवर्तन भएको पनि बताएका छन् ।

उनले लेखेका छन्, ‘नयाँ नेतृत्व चयनका क्रममा महाधिवेशनमा स्वस्थ र कमरेड्ली प्रतिस्पर्धा देखियो । पार्टी अध्यक्ष कमरेड केपी शर्मा ओलीद्वारा प्रस्तावित टीम प्रायः सर्वसम्मत रूपमा अनुमोदित भयो, जसमा एक जना उपमहासचिव–म स्वयं र एक जना उपाध्यक्ष बाहेक सबै निर्वाचित हुनुभयो । यो न त अस्वाभाविक हो, न त चिन्ताको विषय हो । यस्ता परिणामहरू लोकतान्त्रिक प्रतिस्पर्धाका स्वाभाविक र स्वस्थ अभ्यास हुन् ।’

रिमालले जनताको बहुदलीय जनवादको मूल भावना नै प्रतिस्पर्धालाई आत्मसात गर्नु, आफ्नो श्रेष्ठता स्थापित गर्नु र नेतृत्वको म्यान्डेट प्राप्त गर्नु रहेको उल्लेख गर्दै फेसबुकमा लेखेका छन्, ‘यही भावनामा हामी सबैले परिणामलाई आत्मविश्वास, संयम र प्रतिबद्धताका साथ स्वीकार गरेका छौँ ।’

प्रधानमन्त्री हुँदा ओलीका प्रमुख राजनीतिक सल्लाहकार र विश्वास प्राप्त नेता मानिने रिमालले अब पार्टीमा आफ्नो भूमिका परिवर्तन भएको पनि जनाएका छन् ।

‘पार्टीभित्र मेरो औपचारिक भूमिका परिवर्तन भए पनि हाम्रो साझा संकल्प र कमरेड्ली भावना यथावत् छ । आगामी दिनहरूमा पनि हामी एउटै मार्गमा सँगसँगै अघि बढ्नेछौँ,’ उनले सामाजिक सञ्जालमा उल्लेख गरेका छन् ।