खोज

काठमान्डौ, ३ पुष ।

नेपाली कांग्रेसको भ्रातृ संगठन राष्ट्रिय लोकतान्त्रिक अपाङ्ग संघले अपाङ्गता भएका व्यक्तिहरूका लागि छुट्टै क्लस्टर निर्माण गरी प्रतिनिधिसभामा प्रत्यक्ष प्रतिनिधित्व सुनिश्चित गर्न माग गरेको छ ।

अपाङ्गता भएका व्यक्तिहरूलाई अलग क्लस्टरमार्फत समावेशी समानुपातिक प्रतिनिधित्व नदिनु संवैधानिक अधिकारको उल्लङ्घन हुने संघको ठहर छ ।

संघका अध्यक्ष माधवप्रसाद चम्लागाईंले जारी गरेको विज्ञप्तिमा सरोकारवालासँग कुनै छलफल नगरी संविधानको मर्म र भावना विपरीत अपाङ्गता भएका व्यक्तिहरूलाई प्रतिनिधिसभाबाट वञ्चित गर्ने उद्देश्यले राष्ट्रिय जनगणनाका आधारमा समानुपातिक समावेशी समूहको नयाँ आधार–प्रतिशत तय गर्न गरिएको सिफारिस अस्वीकार्य रहेको उल्लेख गरिएको छ ।

विज्ञप्तिमा २०७८ सालको राष्ट्रिय जनगणनाअनुसार अपाङ्गता भएका व्यक्तिहरूको जनसंख्या कम्तीमा २.२ प्रतिशत रहेको यथार्थ हुँदाहुँदै पनि प्रतिनिधिसभामा निर्वाचित हुने सुनिश्चिततासहित अपाङ्गता कोटाबाट छुट्टै क्लस्टर नबनाइनु संविधानको मर्म र भावना विपरीत भएको जनाइएको छ ।

अध्यक्ष चम्लागाईंले अपाङ्गता सम्बन्धी राजनीतिक अधिकार प्रत्यक्ष प्रतिनिधित्वबाट मात्र सुनिश्चित हुन सक्ने स्पष्ट पार्दै अन्य समूहभित्र सीमित र औपचारिक समावेशीताले अपाङ्गता भएका समुदायको वास्तविक राजनीतिक अधिकार प्रत्याभूत गर्न नसक्ने बताएका छन् ।

उनले सरकारसँग अपाङ्गता कोटाबाट न्यूनतम २.२ प्रतिशत सुनिश्चित हुने गरी छुट्टै क्लस्टर निर्माण गरी प्रतिनिधिसभामा निर्वाचित हुने स्पष्ट व्यवस्था गर्न माग गरेका छन् । माग बेवास्ता गरी निर्णय अगाडि बढाइए अन्तिम विकल्पका रूपमा आन्दोलनमा उत्रन बाध्य हुने चेतावनीसमेत विज्ञप्तिमार्फत दिइएको छ ।