खोज

काठमान्डौ, २ पुष ।

नेकपा एमालेको नयाँ नेतृत्व चयनका लागि काठमाडौँको भृकुटीमण्डपमा जारी निर्वाचनमा अहिलेसम्म ३८० मत खसेको छ । आज बिहान ९ बजेदेखि ई–भोटिङ मेसिनमार्फत मतदान भइरहेको छ ।

ई–भोटिङ मेसिन प्रयोग गरिएको भए पनि मतदान प्रक्रियामा अपेक्षाकृत धेरै समय लागिरहेको भन्दै मतदाताहरूले गुनासो गरेका छन् । मतदान गरेर बाहिर निस्किएका एक जना महाधिवेशन प्रतिनिधिले भने, ‘जान्ने व्यक्तिलाई पनि २५–३० मिनेट लाग्छ । नाम सूची हेर्नुपर्नेहरूलाई त ५० मिनेटसम्म लाग्ने रहेछ ।’

निर्वाचन व्यवस्थापनतर्फ अशक्त मतदातालाई प्राथमिकता दिई अगाडि मत खसाल्ने व्यवस्था गरिएको छ । आफैँ मतदान गर्न नसक्ने मतदाताले आफूले इच्छाएको व्यक्तिबाट सहयोग लिन पाउने व्यवस्था पनि गरिएको छ ।

जारी निर्वाचनका लागि ८० वटा ई–भोटिङ मेसिन प्रयोगमा ल्याइएको छ । एक जना प्रतिनिधिले करिब ३ सय हाराहारी उम्मेदवारलाई मतदान गर्नुपर्ने भएकाले पनि मतदान प्रक्रिया लामो भएको बताइएको छ ।

यस निर्वाचनमार्फत ३०१ सदस्यीय केन्द्रीय कमिटी चयन हुँदैछ । पदाधिकारीतर्फ अध्यक्ष १, उपाध्यक्ष ५, महासचिव १, उपमहासचिव ३ र ९ जना सचिव निर्वाचित हुने छन् । अध्यक्ष पदमा केपी शर्मा ओली र ईश्वर पोखरेल प्रतिस्पर्धामा छन् । दुवै प्यानलबाट गरेर करिब ६ सय ५० जना उम्मेदवार चुनावी मैदानमा छन् ।

मतदानका लागि बुथभित्र प्रवेश गरेपछि निर्वाचन आयोगले प्रमाणित गरेको ई–भोटिङ मेसिनको टच स्क्रिन डिस्प्ले देखिन्छ । स्क्रिनमा उम्मेदवारहरूको नाम र फोटो देखाइन्छ । मतदाताले आफूले रोजेको उम्मेदवारको फोटो टच गरी मत जाहेर गर्नुपर्छ । मतदान सफल भएपछि सम्बन्धित फोटोमा स्वस्तिक चिह्न देखिन्छ ।

मेसिनमा उम्मेदवारहरू पदीय मर्यादाक्रमअनुसार माथिबाट तल राखिएका छन् । अध्यक्ष, उपाध्यक्ष, महासचिव हुँदै क्रमैसँग मतदान गर्नुपर्ने व्यवस्था छ । एक पदमा मतदान नगरी अर्को पदमा जान पाइँदैन ।

सबै पदमा मतदान पूरा भएपछि मेसिनले मत सुरक्षित रूपमा रेकर्ड गर्छ । मतदान सफल भएको संकेतका रूपमा ‘बिप’ आवाज वा अडियो सन्देश सुनिन्छ ।

मतदानमा समय लागे पनि मतगणनामा धेरै समय नलाग्ने निर्वाचन आयोगको अनुमान छ । ई–भोटिङ मेसिनमार्फत भएको मतदानको तथ्यांक संकलन र प्रमाणीकरण गर्न करिब ४ देखि ५ घण्टा लाग्न सक्ने जनाइएको छ ।