खोज

काठमान्डौ, २ पुष ।

राष्ट्रिय स्वतन्त्र पार्टीका सभापति रवि लामिछानेविरुद्ध राहदानी दुरुपयोगसम्बन्धी मुद्दा दायर गर्न माग गर्दै परेको रिट निवेदनको सुनुवाइ आज सर्वोच्च अदालतमा हुँदैछ । अदालतले उक्त रिटका लागि आज पेसी तोकेको हो ।

युवराज पौडेल (सफल) ले लामिछानेविरुद्ध राहदानी कसुरमा मुद्दा चलाउनुपर्ने मागसहित दुई वर्षअघि दायर गरेको रिटको सुनुवाइ हुन लागेको हो । महान्यायाधिवक्ता कार्यालयले लामिछानेविरुद्ध मुद्दा नचलाउने निर्णय गरेको विषय कानुनविपरीत रहेको दाबी गर्दै उनले सर्वोच्च अदालतमा रिट दायर गरेका थिए ।

महान्यायाधिवक्ता कार्यालयले २०७९ चैत ६ गते लामिछानेविरुद्ध राहदानी प्रकरणमा मुद्दा चलाउन नपर्ने निर्णय गरेको थियो । यसअघि प्रहरी र सरकारी वकिल कार्यालयले पनि सोही प्रकरणमा मुद्दा नचलाउने निर्णय गरेका थिए ।

रिट निवेदनमा पौडेलले आफू अमेरिकी नागरिक भएको अवस्थामा पनि नेपाली नागरिक हुँ भनी विवरण पेस गरी नेपाली राहदानी प्राप्त गर्नु राहदानी ऐन, २०२४ को दफा ५९ख० विपरीतको कार्य तथा कसुर भएको स्पष्ट रहेको जिकिर गरेका छन् । यस्तो अवस्थामा समेत महान्यायाधिवक्ताले लामिछानेविरुद्ध मुद्दा नचलाउने निर्णय गर्नु दुराग्रहपूर्ण रहेको उनको दाबी छ ।

महान्यायाधिवक्ताले लामिछानेको राहदानी प्राप्त गर्ने क्रममा आपराधिक मनसाय नरहेको भन्दै आफ्नो क्षेत्राधिकारभन्दा बाहिर गई निष्कर्ष निकालेको समेत पौडेलको आरोप छ ।

रिटमा लामिछानेले उक्त राहदानी कुन–कुन समयमा र के–कुन प्रयोजनका लागि प्रयोग गरेका थिए भन्ने विवरण अध्यागमन विभागबाट झिक्न माग गरिएको छ । साथै, दोहोरो छलफल नहुँदासम्म लामिछानेलाई नेपाली नागरिकको हैसियतमा राजनीतिक अधिकार प्रयोग गर्न नदिन सर्वोच्च अदालत नियमावली, २०७४ को नियम ४९ बमोजिम निर्वाचन आयोगलगायत विपक्षी निकायका नाममा अन्तरिम आदेश जारी गर्न माग गरिएको छ ।