खोज

चन्द्रौटा, २ पुस ।

शिवराज नगरपालिका वडा नम्बर–१ का वडा अध्यक्ष खिमबिक्रम केसीले श्रमिकको योगदानबिना कुनै पनि विकास सम्भव नरहेको बताएका छन् । कपिलवस्तुको शिवराज–१, उमरीमा भएको नेपाल स्वतन्त्र निर्माण श्रमिक समूहको प्रथम साधारण सभा कार्यक्रमलाई सम्बोधन गर्दै उनले यस्तो बताएका हुन् ।

विकास निर्माणदेखि उच्च तहका कार्यमा श्रमिकको पसिना र मेहनतले नै विश्व धानेको केसीले उल्लेख गरे । निर्माण क्षेत्रका श्रमिकहरू जोखिमपूर्ण काममा संलग्न हुने भएकाले उनीहरूको सुरक्षालाई प्राथमिकतामा राख्नुपर्ने उनले बताए । “श्रमिक सुरक्षित भए मात्र विकास दिगो हुन्छ,” वडा अध्यक्ष केसीले भने ः “स्थानीय सरकार श्रमिकका हकहित र सुरक्षाका विषयमा सधैँ साथमा रहनेछ ।”

यसैबिच नेपाल निर्माण तथा सम्बद्ध श्रमिक सङ्घ कपिलवस्तुका अध्यक्ष गणेश थारुले निर्माण कार्य संवेदनशील क्षेत्र भएकाले सजग भएर काम गर्नुपर्नेमा जोड दिए । उनले घरधनी र कामदारबिच स्पष्ट लेनदेनको सम्झौता गरेर मात्र निर्माण कार्य सुरु गर्नुपर्ने बताए । श्रमिकको जीवन सुरक्षा अत्यन्त महत्त्वपूर्ण भएकाले बिमा अनिवार्य गर्नुपर्ने उनले धारणा राखे । कामको क्रममा हुने दुर्घटनाले श्रमिक र परिवारलाई ठुलो असर पार्न सक्ने बताउँदै बिमा र सुरक्षाका मापदण्ड पालना गर्न थारुले आग्रह गरे ।

कार्यक्रममा बोल्ने अधिकांश वक्ताहरूले श्रमिकहरूको हक अधिकार, सुरक्षित कार्य वातावरण, सीप अभिवृद्धि तथा सङ्गठन सुदृढीकरणका विषयमा जागरूक हुनुपर्ने समूहका अध्यक्ष लक्ष्मण थारुले बताए । समूहका सचिव आशाराम थारुका अनुसार स्थानीय श्रमिक, सङ्घका प्रतिनिधि तथा सरोकारवालाहरूको सहभागिता रहेको थियो । नगर भित्रका ७५ वटा निर्माण क्षेत्रमा कार्यरत रहेको व्यावसायिक संस्थाहरू श्रमिक समूहमा आबद्ध रहेका छन् । अहिले समूहमा आबद्ध भएर कार्यरत रहेको कामदारहरूको बिमा र परिचयपत्र बनाउने कार्यलाई तीव्रता दिई कार्यान्वयनमा जोड दिएका उनले बताए ।

यसैबिच नेपाल निर्माण तथा सम्बद्ध श्रमिक सङ्घ बाणगंगा नगर समितिका अध्यक्ष तुलसीराम थारु, थारु कल्याणकारिणीसभा शिवराज नगर समितिका सभापति प्रकाश चौधरी, रामु सुनार, फानेश्वर न्यौपाने, मनिराम बढई लगायतले मङ्गलवार कार्यक्रमलाई सम्बोधन गरेका थिए ।