खोज

कतार, १८ मंसिर ।

लोक तथा दोहोरी संगीतको मौलिकता जोगाउने प्रमुख माध्यममध्ये रत्यौली एक महत्वपूर्ण विधा मानिन्छ। विवाहका समयमा दुलाहा–दुलही लिन घरबाट निस्केपछि दुलहाको घरमा नाचगानसहित गाइने गीतलाई रत्यौली भनिन्छ। शब्द र भाव दुवैतिरबाट केही द्धिअर्थीताको छायाले भरिएका यस्ता गीतहरूकै संरक्षण र प्रवर्द्धनका लागि कतारमा रहेका म्याग्दीका तिलु शर्मा पौडेल दुई दशकभन्दा बढी समयदेखि निरन्तर सक्रिय छन्। उनले मौलिक रत्यौलीको निर्माण तथा बजार विस्तारमा उल्लेखनीय योगदान दिँदै आएका छन्।

यही क्रममा पौडेलको निर्माणमा तैयार भएको नयाँ रत्यौली गीत ‘फूलको माला’ सोमबार सार्वजनिक भएको छ। पौडेलकै बाबाः इन्टरटेनमेन्ट टिभी युट्युब च्यानलबाट रिलिज गरिएको उक्त गीतमा शब्द, संगीत र भोकल तीनै जिम्मेवारी रबिन लामीछानेले सम्हालेका छन्। वैवाहिक जीवनमा बाँधिएपछि जर्मनीमा बसोबास गर्दै आएका लामीछानेले लामो अन्तरालपछि ‘फूलको माला’मार्फत संगीत क्षेत्रमा पुनरागमन गरेका हुन्। गीतमा शान्तिश्री परियारको आवाज समेत समावेश छ भने संगीत संयोजन याम थापा मगरले गरेका छन्।

प्रविण थापाको कोरियोग्राफी र निर्देशनमा बनेको भिडियोमा छमछमी सिजन ३ तथा डान्सिङ स्टार नेपाल सिजन २ का विजेता सरोज प्रजा राना र हालै सार्वजनिक भएको ‘मन बिनाको धन’ की नायिका तथा मोडल बिना राउतको आकर्षक अभिनय र नृत्य समेटिएको छ। प्रेममा परेपछि मनपर्ने व्यक्तिको एक झलक देख्दा नै संसार जितेको अनुभूति हुने भावनालाई गीतले रोमान्टिक शैलीमा प्रस्तुत गरेको छ।

भिडियो छायांकन राजेश घिमिरेले गरेका हुन् भने सम्पादन सुजन कोईरालाले गरेका छन्। मारुनी रेकर्डिङ स्टुडियोमा सुनन र खुमन रानाले रेकर्ड गरेका गीतको ध्वनि मिश्रण कुमार रानाले सम्पन्न गरेका हुन्।

गीत सार्वजनिक भएको थोरै समयमै युट्युब, टिकटक, फेसबुकलगायत सामाजिक सञ्जालमा दर्शक–श्रोताको उल्लेखनीय ध्यानाकर्षण गर्न सफल भएको छ।