खोज

भैरहवा, ९ मङ्सिर । 

सुशासन र भ्रष्टाचार नियन्त्रणको माग राखी जेन जी युवाहरूबाट भएको प्रदर्शनपछि “शून्यलाई पूरा गर्न” विषम परिस्थितिमा गठन भएको वर्तमान सरकारले तोकिएको मितिमा निर्वाचन सम्पन्न गर्नलाई आफ्नो प्रमुख अभिभारा मानेको छ ।

मंगलबार भैरहवामा लुम्बिनी प्रदेश स्तरीय सुरक्षा गोष्ठीलाई सम्बोधन गर्दै गृह मन्त्री ओमप्रकाश अर्यालले सरकारको मुख्य लक्ष्य सुशासनको आधार बलियो बनाएर निर्वाचित सरकारलाई सत्ता हस्तान्तरण गर्नु रहेको बताएका छन् ।

गृह मन्त्री अर्यालले चुनाव हुँदैन भन्ने कुराहरूलाई सरकारले आफ्नो कामबाट जवाफ दिने स्पष्ट पार्दै, यो सरकार कसैको निगाहा वा व्यक्तिगत इच्छाले नबनेको जिकिर गरे । मन्त्री अर्यालले निर्वाचनको तयारीका लागि यो सुरक्षा गोष्ठी आयोजना गरिएको बताउँदै यसले लुम्बिनी प्रदेशका सुरक्षा चुनौतीहरूको संश्लेषण गरी आवश्यक रणनीति तय गर्ने बताए ।

उनले युवा पुस्ताले कार्यसम्पादनमाथि प्रश्न उठाइसकेपछि पनि नसच्चिने, एकले अर्कालाई दोषारोपण गर्ने र खराबलाई खराब नभन्ने हो भने फेरि अर्को दुर्घटना हुन सक्ने भन्दै सबैलाई जिम्मेवारी बोध गर्न आग्रह गरे ।

राजनीतिक दलहरूले प्रमुख चुनौतीका रूपमा औँल्याएका लुटिएका हतियार र फरार कैदी बन्दीहरू लाई फिर्ता ल्याउने प्रयासहरू भइरहेको र ठुलो सङ्ख्यामा सफलता मिलेको उनले जानकारी दिए । गोष्ठीमा यी प्रयासहरूको समीक्षा गरी थप प्रभावकारी रणनीति बनाइनेछ ।

शान्ति सुव्यवस्था कायम गर्न र निर्वाचनको वातावरण सिर्जना गर्न प्रदेश सरकारको भूमिका महत्त्वपूर्ण रहेको उल्लेख गर्दै, केन्द्रीय सुरक्षा समितिबाट स्वीकृत योजनाबमोजिम प्रादेशिक सुरक्षा योजना बनाई कार्यान्वयन गर्न उनले विश्वास व्यक्त गरे ।

लुम्बिनी प्रदेशलाई राजस्व चुहावटको दृष्टिले जोखिमको प्रदेश को रूपमा व्याख्या गर्दै गृह मन्त्रीले चुहावट नियन्त्रणमा सरकारले “शून्य सहनशीलता” को नीति अवलम्बन गरेको बताए ।

उनले सरकारी संयन्त्रलाई व्यावसायिक ढङ्गले काम गर्न निर्देशन दिँदै भने, “कसैलाई गलत तवरले रिझाउनुपर्ने अवस्था छैन, व्यावसायिक ढङ्गले कार्य सम्पादन गर्दा पुग्नेछ।” गोष्ठीसँगै राजस्व चुहावट नियन्त्रणमा सरकारी संयन्त्रका कमजोरीहरू अन्त्य हुनुपर्नेमा उनले जोड दिए ।

सुरक्षा निकायलाई व्यावसायिक आचरणभित्र रही कानुनबमोजिम प्राप्त अधिकार प्रयोग गर्नमा पूर्ण स्वतन्त्रता र स्वायत्तता प्रदान गरिएको तर निगरानी भने बढाइएको मन्त्री अर्यालले स्पष्ट पारे ।

उनले अपराधका घटना हुने तर माथिको मुख ताकेर अनुसन्धान हुने परिपाटी अब अन्त्य भएको घोषणा गर्दै सबैलाई निष्पक्ष भएर गैर कानुनी क्रियाकलापलाई कानुनको दायरामा ल्याउन निर्देशन दिए । जुनसुकै आवरणमा हुने गलत कार्यहरू रोकिनुपर्ने तर निर्दोष पर्न नहुनेमा उनले सचेत गराए ।

गृह मन्त्रीले यो गोष्ठीले लुम्बिनी प्रदेशमा पाँच कुराहरूको सुनिश्चितता गर्दै टुङ्गोमा पुग्ने विश्वास व्यक्त गरे ।

उनले तोकिएको मितिमा निर्वाचन सम्पन्न गर्न सुरक्षा चुनौती सामना गर्न सक्षम हुने गरी सुरक्षा योजना तयार र कार्यान्वयन, कार्यस्थलमा फर्किँदा कार्यशैलीमा जनताले महसुस हुने गरी सुधार, समूह कार्यमा प्रभावकारिता वृद्धि, कानुनी राज्यको अवधारणा बमोजिम स्वतन्त्र र निष्पक्ष ढङ्गबाट कार्यसम्पादन र सरोकारवालाहरूसँगको समन्वय र सहकार्यलाई थप सुदृढ बनाइनेमा जोड दिए ।