खोज

भैरहवा, ९ मङ्सिर ।

लुम्बिनी प्रदेशका मुख्यमन्त्री चेत नारायण आचार्यले प्रदेशको सुरक्षा अवस्था सन्तोषजनक नरहेको भन्दै जनता र सुरक्षाकर्मी दुवैले सुरक्षित महसुस गर्न नसकेको अवस्था रहेको औँल्याएका छन् ।

सुरक्षा गोष्ठीलाई सम्बोधन गर्दै मुख्यमन्त्री आचार्यले सुरक्षा स्थितिको यथार्थपरक समीक्षा आवश्यक रहेकोमा जोड दिए । “जनताहरू अहिले पनि भयभीत छन्, त्रसित छन् र आफूले आफैलाई सुरक्षित भएको अनुभूति गर्न पाइरहेको अवस्था छैन ।

यो कुरालाई हामीले आत्मसात् गर्न जरुरी छ,” मुख्यमन्त्री आचार्यले भने “सुरक्षा निकायले कार्यरत सुरक्षाकर्मीहरू पनि आफू सुरक्षित भएको महसुस गर्न सकिरहेको अवस्था छैन” मुख्यमन्त्री आचार्यले यो गोष्ठीको मुख्य लक्ष्य लुम्बिनी प्रदेशको समग्र सुरक्षा अवस्थामा गहन छलफल गरी ठोस कार्य योजना बनाएर अगाडि बढ्नु रहेको बताए ।

उनले भने, “हामी विशेष गरेर लुम्बिनी प्रदेशको सुरक्षाको बारेमा छलफल गर्ने र १२ जिल्लाका जिल्लाको सुरक्षा स्थितिको बारेमा गहन ढङ्गले छलफल गर्ने र एउटा ठोस कार्य योजना बनाएर अगाडि बढ्ने उद्देश्यका साथ आज यो कार्यक्रमको आयोजना गरिएको छ । ”

मुख्यमन्त्री आचार्यले प्रदेशमा बढिरहेको अराजक गतिविधि र त्यसमा संलग्न समूहलाई नियन्त्रण गर्न सुरक्षा निकायलाई गम्भीर भएर लाग्न आह्वान गरे ।

प्रदेशमा केही समूहहरूले सुरक्षाकर्मी तथा कर्मचारीहरूलाई तेजोवध गर्ने र आपराधिक गतिविधि गरिरहेकोमा चिन्ता व्यक्त गर्दै मुख्यमन्त्रीले भने “ती व्यक्तिहरू, त्यो अराजक समूह अहिले पनि छाती फुलाएर हिँडिरहेको छ ।

ती आपराधिक गतिविधिमा संलग्न हुने व्यक्तिहरूलाई अहिले पनि राज्यले कानुनी दायरामा ल्याउन सकिरहेको अवस्था छैन ।”

मुख्यमन्त्री आचार्यले सुरक्षाकर्मी र कर्मचारीमाथि तेजोवध गर्ने काममा उक्त समूह अहिले पनि लागिरहेको र प्रदेशमा शान्ति सुरक्षा कायम गर्ने जिम्मेवारी लिएका सुरक्षा निकायका प्रमुखहरूले यो विषयमा गम्भीर भएर सोच्नुपर्ने अवस्था आएकोमा जोड दिए ।

मुख्यमन्त्री आचार्यले अराजक समूहले कर्मचारीमाथि र सुरक्षाकर्मीमाथि कसरी तेजोवध गर्ने भन्ने दुर्नियतका साथ योजनाबद्ध किसिमले अगाडि बढेको बताए । उनले यस्ता समूहलाई तत्काल नियन्त्रण गर्न आवश्यक रहेकोमा जोड दिए ।

उनले अझै पनि कारागारबाट फरार कैदी नियन्त्रणमा आई नसकेको र प्रहरीका लुटिएका हतियार पनि फिर्ता नभएको अवस्थामा हुने निर्वाचनमा शङ्का रहेको बताए ।
बैठकमा गृहमन्त्री ओम प्रकाश अर्यालसँगै, गृह सचिव रामेश्वर दंगाल, लुम्बिनी प्रदेशका मुख्यमन्त्री चेतनारायण आचार्य, नेपाली सेनाका बलाधिकृत रथी प्रदिपजंग के.सी., लुम्बिनी प्रदेशका प्रमुख सचिव कृष्ण प्रसाद काप्री, नेपाल प्रहरीका महानिरीक्षक दान बहादुर कार्की, सशस्त्र प्रहरी बल, नेपालका महानिरीक्षक राजु अर्याल, राष्ट्रिय अनुसन्धान विभागका मुख्य अनुसन्धान निर्देशक टेकेन्द्र कार्की, नेपाली सेना मध्य पश्चिम पृतना हेडक्वार्टरका पृतनापति उपरथी प्रेम बहादुर पुन, गृह मन्त्रालय सुरक्षा तथा समन्वय महाशाखा प्रमुख आनन्द काफ्ले, गृह मन्त्रालय नीति, योजना अनुगमन तथा मूल्याङ्कन महाशाखा प्रमुख सुरेश पन्थी, आन्तरिक मामिला तथा कानुन मन्त्रालय लुम्बिनी प्रदेशका सचित्र लोक बहादुर सुनार, प्रदेश सुरक्षा निकायका पदाधिकारी, सबै जिल्लाका प्रमुख जिल्ला अधिकारी लगायत जिल्ला सुरक्षा समितिका पदाधिकारी, गृह मन्त्रालय र आन्तरिक मामिला तथा कानुन मन्त्रालयका कर्मचारीहरूको सहभागिता रहेको छ ।