खोज

काठमाडौँ ।

आफूविरुद्ध अविश्वासको प्रस्ताव दर्ता गर्न पुगेका सांसदमाथि मधेस प्रदेशका सभामुख रामचन्द्र मण्डलले हातपात गरेका छन् ।

मण्डलले पदअनुकूल आचारण नगरेको भन्दै सात राजनीतिक दलले बिहीबार साँझ उनीविरुद्ध प्रदेशसभा सचिवालयमा अविश्वासको प्रस्ताव दर्ता गर्न गएका थिए ।

सात दलीय गठबन्धनका ६४ जना सांसद प्रदेशसभा सचिवालय पुग्दा सभामुख मण्डलले गुण्डा परिचालन गरेर विपक्षी सांसदमाथि हातपात गरेका माओवादी केन्द्रका सांसद दबाहरलाल कुशवाहाले बताए ।

‘बिहीबार साँझ हामी २०–२२ जना सांसद सभामुखविरुद्ध अविश्वासको प्रस्ताव दर्ता गर्न प्रदेशसभा सचिवालयमा गएका थियौँ । सभामुख मण्डलले ५०–६० जना गुण्डा परिचालन गरेर हामीमाथि हातपात गर्नुभयो,’ कुशवाहाले  भने । ‘सभामुख आफैँले जनमतका महेश यादवको सर्टको कलर समातेर तान्नुभयो ।

लोसपाका उपेन्द्र महतो र जसपाका राजु गुप्तालाई पनि हात हालेर हातपात गर्नुभयो । उहाँले हिजो साँझ आफ्नो कार्यकक्ष अगाडि पूरै गुण्डा शैलीमा सांसदमाथि हातपात गर्नुभयो ।’

त्यसक्रममा सभामुख र एमालेका कार्यकर्ताले आफूहरूलाई दुई घण्टासम्म उपसभामुखको कार्यकक्षमा थुनेको पनि कुशवाहाले बताए ।

‘सभामुखले गुण्डा उतारेर हामीलाई उपसभामुखको कार्यकक्षमा थुन्नुभयो । बिहीबार साँझ साढे पाँचदेखि साँढे सातसम्म हामीलाई कोठामा थुनियो,’ कुशवाहाले भने । ‘पछि डीएसपीसहित प्रहरी टोली आएपछि मात्रै हामीलाई छाडिएको थियो ।’

तर, सभामुख र एमालेको अवरोध छिचोल्दै उनीहरूले सभामुख मण्डलविरुद्ध अविश्वासको प्रस्ताव दर्ता गरेको उनले बताए ।

कुशवाहाका अनुसार सांसदहरू सचिवालयमा पुग्दा उपसभामुखले तोक लगाइसकेको प्रस्ताव दर्ता गर्न सभामुख मण्डलले रोक्ने प्रयास गरेका थिए । तर, सभामुखले रोक्दारोक्दै पनि सचिवालयका कर्मचारीले उनीविरुद्धको अविश्वासको प्रस्ताव दर्ता गरेका छन् ।