खोज

काठमाडौंँ, २४ कात्तिक ।

जनमत पार्टीका अध्यक्ष डा. सीके राउतले मधेस प्रदेशलाई स्वायत्त घोषणा गर्न आह्वान गरेका छन् ।

मधेसमा नयाँ मुख्यमन्त्री नियुक्तिको विषयमा विवाद चलिरहेका बेला राउतले मधेस प्रदेशसभाको बैठकबाटै प्रदेशको स्वायत्तता घोषणा गर्न प्रस्ताव गरेका हुन् ।

जनकपुरबाट काठमाडौं जान भनेर हिँडेकी प्रदेश प्रमुख सुमित्रा सुवेदी भण्डारीले बर्दिवासस्थित होटलमा एमालेका नेता सरोज कुमार यादवलाई मुख्यमन्त्रीको शपथ खुवाएपछि राजनीतिक विवाद चर्किएको छ ।

राउतले सोमबार बिहान सामाजिक सञ्जालमार्फत यस्तो लेखेका छन् “मधेस प्रदेशसभाको बैठकबाट मधेस प्रदेशको स्वायत्तता घोषणा गरौँ । आफ्नै प्रदेश प्रहरी र प्रशासनसहितको सरकार गठन गरौँ । डराएर सदियौँ नेपाली शासकको गुलामी गर्‍यौँ, अब खुलेर बोलौँ ।”

उनले भनेका छन् “संविधानलाई धज्जी उडाउँदै नेपाली औपनिवेशिक शासकले खटाएका प्रदेश प्रमुख, सभामुख, निर्वाचन आयोग र उनीहरूको अदालतले जे पनि गर्न मिल्छ ।

मधेसका पार्टीलाई छिन्नभिन्न पार्ने, पानस कटेजमा गएर शपथग्रहण गराउने, मधेस पक्षधर नेता, कार्यकर्ता र समर्थकमाथि प्रतिशोध साँध्दै दमन गर्ने काम गर्छ भने हामीले मधेस प्रदेशसभाको बैठक सडकमा नै डाकेर भए पनि मधेस प्रदेशलाई स्वायत्त घोषणा गरौँ ।”

राउतले हालको संघीय सरकार नै संविधानबमोजिम बनेको नभएको दाबी गर्दै भनेका छन् “आन्दोलनको मागबमोजिम बनेको यो संघीयता अब मधेसी जनताको चाहनाबमोजिम रूपान्तरण हुनुपर्छ । मधेस प्रदेशसभाको दुईतिहाइ सभासदको समर्थनमा मधेसलाई स्वायत्त घोषणा गर्न पक्कै मिल्छ ।”

उनले थपे “५४ प्रतिशत जनसंख्या भएको मधेस मुठ्ठीभर नेपाली शासकको जागिर होइन । उनीहरूले भिखजस्तो दिएर हामीले लिइराख्ने होइन । उनीहरूले चलखेल गरिराख्ने, हामीले टुलुटुलु हेरिराख्ने अवस्था अब सह्य छैन ।”

राउतका अनुसार, मधेसमा सिंहदरबारबाट पठाइएका प्रदेश प्रमुख, सभामुख, निर्वाचन आयुक्त, अख्तियार, प्रहरी र सचिवलगायतका कर्मचारीमार्फत मधेसलाई एक हुन नदिने र दमन गरिराख्ने षड्यन्त्र चलिरहेको छ ।

उनले निष्कर्षमा भनेका छन् “मधेस हाम्रो हो र यहाँ हाम्रो आफ्नै शासन हुनैपर्छ । नेपाली औपनिवेशिक शासनको अन्त्य गर्ने सही मौका यही हो । पूर्ण स्वायत्तताको आन्दोलन अब अपरिहार्य छ ।”