खोज

बुटवल, २३ कात्तिक ।

रोट-याक्ट क्लब अफ बुटवल साउथको आयोजनामा बुटवल–११ देवीनगर रंगशालामा सञ्चालन भइरहेको ‘प्रथम बुटवल फिस टनेल एण्ड दुबई सिटी साँस्कृतिक तथा रमाइलो मेला २०८२’ मा पछिल्ला दिनहरूमा दर्शकहरूको आकर्षण क्रमशः बढ्दै गएको छ । सुरुवाती चरणमा दर्शक अपेक्षाकृत कम उपस्थिति भएपनि अहिले मेलाको माहोल उत्साहजनक बनेको छ ।

मेला आयोजकका अनुसार प्रारम्भिक तीन दिन निरन्तर वर्षा भएकाले उद्घाटन कार्यक्रम प्रभावित भएको थियो । तर मौसमी सुधार भएपछि दर्शकसंख्या उल्लेख्य रुपमा बढ्दै गएको र वातावरण पनि रमाइलो बनेको क्लब अध्यक्ष इपल भण्डारीले जानकारी दिए । उनले भने, “पहिलो केही दिन पानीले असर पु-यायो, तर अहिले दर्शक संख्या द्रुत रूपमा बढ्दैछ, शनिबार दर्शकको चाँप उत्साहजनक रह्यो । स्थानीय परिवार, विद्यार्थी र युवाहरूको सहभागिता उल्लेख्य छ ।”

 मेलामा दर्शक आकर्षणका प्रमुख केन्द्रहरूमा फिस टनेल, दुबई सिटी मोडल, वैष्णो देवी मन्दिर, साँस्कृतिक कार्यक्रमहरू र टिकटक प्रतियोगिता रहेका छन् । फिस टनेलमा जलपरीको रमाइलो दृश्य अवलोकन गर्न आउनेको भीड देखिन थालेको छ भने दुबई सिटी मोडलमा नयाँ अनुभव लिन आउनेहरूको चहलपहल बढ्दैछ ।

मेलामा स्थानीय तथा राष्ट्रिय कलाकारहरूको प्रस्तुति, विभिन्न मनोरञ्जनात्मक खेल, परिकारका स्टलहरू र हस्तकला प्रदर्शनीले पनि आकर्षण थपेको छ । आयोजकले विद्यार्थी र जेष्ठ नागरिकका लागि छुट व्यवस्था राखेका छन् । विद्यार्थीहरूले परिचयपत्रको आधारमा ४० रुपैयाँमा प्रवेश पाउँछन् भने ७० वर्षभन्दा माथिका जेष्ठ नागरिक र अपाङ्गता भएका व्यक्तिहरूलाई निःशुल्क प्रवेशको सुविधा छ ।

अध्यक्ष भण्डारीका अनुसार, “यो मेला केवल मनोरञ्जनका लागि होइन, सामाजिक कार्यका लागि सहयोग जुटाउने उद्देश्यले आयोजना गरिएको हो ।” उनले स्थानीयहरूलाई मेलामा सहभागी भई सामाजिक उद्देश्यमा हातेमालो गर्न आग्रह गरे ।

मेला मंसिर २ गतेसम्म चल्नेछ र आयोजकले आगामी दिनहरूमा दर्शकको भीड अझ बढ्ने अपेक्षा गरेका छन् । बिदाका दिनहरूमा मेलामा उत्साहपूर्ण भीड हुने विश्वास गरिएको छ ।

मेला व्यवस्थापन समितिका सांस्कृतिक संयोजक शंकर काफ्लेले विदेशी मुलुकमा देख्न पाइने जलपरी नेपालमै पहिलो पटक बुटवलमा ल्याउंदा दर्शकहरुको उल्लेख्य उपस्थिति भएको बताए । त्यस बाहेक दुवई सिटी र बैष्णुदेवीको मन्दिर पनि दर्शकहरुको आर्कषणको रूपमा रहेको छ । जलपरी अवलोकन गर्ने दर्शकका लागि २ सय रुपैयांको टिकट कायम गरिएको छ ।

दिउँसंो ३ बजे देखि राति ९ बजे सम्म जलपरीको शो मेलामा देख्न पाइने उनले बताए । कात्तिक १३ गते देखि सुरु भएको रमाइलो मेला मंसिर २ गते सम्म चल्ने मेला व्यवस्थापन समितिका अध्यक्ष इपल भण्डारीले बताए ।

स्वदेशी वस्तुको प्रवद्र्धन, कृषि एवं औद्योगिक उत्पादनमा टेवा पुराउने उद्देश्यले आयोजना गरिएको मेलाको व्यवस्थापन जय माता दी एम्युजमेन्ट इभेन्ट म्यानेजमेन्ट प्रा.लि.ले गरेको छ । विहिबार मात्र मेलामा गायक खुमन अधिकारी, रामप्रसाद पाण्डेय, गायिका सकुन्तला गैरे लगाएतका कलाकारहरुले प्रस्तुती दिएका थिए । मेलामा सोनी डान्स ग्रुपको उत्कृष्ट नृत्य समेत दर्शकले अवलोकन गरेका थिए । कात्तिक २१ गते शुक्रबार भने गायक चन्द्र शर्मा, धन बहादुर गुरुङ, गायिका रेनु राना मगर, हिरा थापा लगाएतका कलाकारहरुको प्रस्तुती रहेको थियो । २२ गते गायिका ज्योती मगर लगायतका कलाकारले आफ्नो प्रस्तुती देखाएका थिए ।

त्यस्तै आज आइतबार भने कलाकारहरु सम्झना लामिछाने, रितु शाही, रवि रिमाल, शिव खनाललगायतको प्रस्तुति रहने छ ।