खोज

बुटवल, २० कात्तिक ।

मणिमुकुन्द सेन उद्यान संरक्षण समितिका कर्मचारीहरुलाई २ दिने नर्सरी व्यवस्थापन तालिम दिइएको छ । नमुना फुलबारीका रूपमा विकास गर्ने उद्देश्यसहित कर्मचारीहरूलाई फूल उत्पादन, बिरुवा संरक्षण, रोग व्यवस्थापनदेखि नर्सरी सञ्चालनका आधुनिक विधि सम्बन्धी व्यवहारिक ज्ञान प्रदान गरिएको हो ।

बिहिबार सम्पन्न तालिम समापन कार्यक्रममा समितिका अध्यक्ष माधव नेपालले उद्यानलाई आगामी वर्षभित्र नमुनात्मक फुलबारीको रूपमा प्रस्तुत गर्ने लक्ष्य रहेको बताए । सामरिक महत्व बोकेको उद्यान रमणीय र शैक्षिक उद्यान भएको उनले बताए । दीर्घकालीन योजनासहित समिति क्षमता अभिवृद्धि र विकासका कार्यक्रमलाई अघि बढाएको उनले बताए । कर्मचारीहरु व्यावहारिक रूपमा प्रयोगमा ल्याउन सकिने प्रविधि सिकाई हुने गरि तालिम दिईएको उनले बताए ।

प्रशिक्षक दिनेश बादे र सीताराम लामिछानेले प्रशिक्षण दिएका थिए । उनीहरूले उद्यानको वर्तमान अवस्थालाई अझ व्यवस्थित, आकर्षक र दिगो बनाउन नर्सरी व्यवस्थापन महत्वपूर्ण रहेको उल्लेख गरे । नर्सरीको आधारभूत संरचना, मल–जल व्यवस्थापन, मौसमी फूल उत्पादन र रोग–कीरा नियन्त्रणका प्रभावकारी उपायहरूबारे प्रशिक्षण दिईएको प्रशिक्षक बादेले बताए । निरन्तर अभ्यास र निगरानी नै सफल नर्सरीको मुख्य आधार हुने उनले बताए ।

कार्यक्रममा समितिका प्रमुख कार्यकारी अधिकृत अनन्त सिलवालले नमुना फुलबारी बनाउन कर्मचारीहरूको सीप अभिवृद्धि अपरिहार्य रहने हुदा पनि तालिमलाई प्राथमिकता दिएको बताए । उद्यानको गुणस्तर सुधारमा प्रत्यक्ष सहयोग गर्ने गरि कार्यक्रम गरिएको उनले बताए । फूलबारी सुन्दर देखिनु मात्र होइन, त्यसलाई दिगो बनाइराख्न सीपयुक्त जनशक्ति तालिमबाट उत्पादन हुने उनले बताए । दुई दिनसम्म चलेको तालिममा समितिका सहायक स्तरका स्थाई र ज्यालादारी गरि २८ जना कर्मचारीहरु सहभागी रहेको महासचिव युवराज घिमिरेले बताए ।