खोज

काठमान्डौ, १५ कार्तिक ।

काठमान्डौसहित देशका मध्य र पूर्वी भूभागमा जारी झरी अपेक्षाभन्दा लम्बिएको छ । बागमती, गण्डकी र तराईका जिल्लाहरूमा आज बिहानसम्म मौसम खुल्ने अनुमान गरिएको भए पनि वर्षा अझै जारी छ ।

मौसमविद् उज्वल उपाध्यायका अनुसार मौसमी पूर्वानुमानका तीनवटा मोडेलको संयुक्त अध्ययनले यी प्रदेशहरूमा झरी लम्बिनुको कारण स्पष्ट पारेको छ ।

बिहीबारदेखि कमजोर बनेको मोन्था आँधी सोमबारदेखि सक्रिय तर पूर्ण रूपमा नबाहिरिएको पश्चिमी वायुसँग मिसिँदै ठूलो संयुक्त मौसमी प्रणाली बनेको छ, जसले नेपालसहित व्यापक क्षेत्र ढाकेको छ । यो प्रणाली हिजो रातिसम्म कोशी हुँदै बंगालको खाडीतर्फ सर्नुपर्ने भए पनि बंगालको खाडी नजिकै थाइल्याण्डको दक्षिणी भूभागमा बनेको र हाल बङ्गलादेशमा अवस्थित नयाँ चक्रवातीय प्रणालीले यसलाई उल्टो दिशातर्फ—उत्तर–पश्चिमतर्फ—धकेलेको छ ।

यसैबीच, अरब सागरबाट अर्को सक्रिय प्रणाली गुजरात–राजस्थान हुँदै उत्तर–पूर्वतर्फ सर्दै नेपालतर्फ उन्मुख छ । फलस्वरूप देशमा अहिले पश्चिम, दक्षिण र पूर्व तीनै दिशाबाट जलवाष्पयुक्त वायुको तीव्र दबाब परेको छ । यसले गर्दा गण्डकी, बागमती र कोशी प्रदेशमा वर्षा गराउने बादल स्थिर रहँदा लगातार झरी परिरहेको छ ।

हावामा जलवाष्पको मात्रा अत्यधिक भएकाले वर्षा रोकिएको बेला पनि स–साना पानीका कणहरू झर्ने—शीत परेजस्तो—अवस्था बनेको मौसमविद् उपाध्यायले बताए ।

उपाध्यायका अनुसार अबको अवस्थाले ठूलो वर्षा नल्याए पनि हल्का झरी जारी रहन सक्छ । बाढीको जोखिम भने न्यून रहेको छ । धेरै मौसमी प्रणाली मिसिएकाले यो स्थिति कति समय कायम रहन्छ भन्ने ठ्याक्कै अनुमान गर्न कठिन रहेको उनले बताए ।

तर, बादलको घनत्व क्रमशः घट्दै गएको र अबको १२ घण्टाभित्र मौसममा उल्लेखनीय सुधार हुने सम्भावना उच्च रहेको उपाध्यायको भनाइ छ । उनका अनुसार साँझसम्म वर्षा पूर्ण रूपमा रोकिने र भोलि बिहानैदेखि घाम लाग्ने संभावना प्रबल छ ।