खोज

गुल्मी, १० कार्तिक ।

गुल्मीका दुई स्थानीय तहले मात्रै १५ शैयाको अस्पताल निर्माण सम्पन्न भई सञ्चालनमा ल्याएका छन् ।  शिलान्यास भएको पाँच वर्ष बित्नलाग्दा दुई स्थानीय तहमा मात्रै अस्पताल निर्माण सम्पन्न भई सञ्चालनमा आएका हुन् ।

जिल्लाको गुल्मीदरबार गाउँपालिका र चन्द्रकोट गाउँपालिकाले १५ शैयाका अस्पताल सञ्चालनमा ल्याएका छन् । तत्कालीन प्रधानमन्त्री केपी शर्मा ओली नेतृत्वको सरकारले देशका ३९६ स्थानीय तहमा २०७७ साल मङ्सिर १५ गते एकै साथ शिलान्यास गरेको थियो ।

गुल्मीदरवार गाउँपालिकाको वडा नं ३ को झाँक्री डाँडामा १५ शैयाको  अस्पताल निर्माण कार्य सम्पन्न गरी केही महिना पहिलेदेखि सञ्चालनमा ल्याएको छ ।  उक्त अस्पताल बिकोइ–अर्जुन–न्यू लिजा जेभीले १२ करोड ९४ लाखमा अस्पताल निर्माणको जिम्मा पाएको थियो । चन्द्रकोट गाउँपालिका वडा नम्बर ४ शान्तीपुरमा पनि अस्पताल सञ्चालनमा आएको छ । गाउँपालिकाका निमित्त प्रमुख प्रशासकीय अधिकृत प्रकाश चन्द्र शर्माका अनुसार लुम्बिनी प्रदेश सरकारबाट एक जना मेडिकल अधिकृत  र पालिकाबाट एक जना मेडिकल अधिकृतका साथै अन्य स्वास्थ्य चौकीबाट आन्तरिक कर्मचारी व्यवस्थापन गरेर अस्पताल सञ्चालनमा ल्याइएको हो ।

अस्पताल सञ्चालनका लागि पालिकाको स्रोत र साधनले सम्भव नहुने भएकाले प्रदेश र केन्द्रको नै मुख ताक्नुवाहेकको विकल्प नभएको शर्माले बताएका छन् । आधारभूत अस्पतालमा तीन जना एमबीबीएस डाक्टरसहित ३२ जनाको दरबन्दी रहेकाले पालिकाले सबै व्यवस्थापन गरेर सञ्चालनमा  ल्याउन सक्ने स्थिति नरहेको उनको भनाइ छ । उक्त अस्पताल कुल  १३ करोड ६६ लाख ४४ हजार सात सय ३६ रुपियाँमा तुल्सीभक्त–अर्जुन बिल्डर्स जेभीले निर्माण सम्पन्न गरेको छ ।

छत्रकोटमा बल्ल बोलपत्रको तयारी

गुल्मीको छत्रकोट गाउँपालिकाका स्वास्थ्य संयोजक श्यामसुन्दर पोखरेलका अनुसार  पहिले शिलान्यास भएको जग्गामा मापदण्ड नपुगेका कारण समस्या भएकाले पछि जग्गाको व्यवस्थापन गरी बोलपत्रको तयारी भएको छ ।  मालिका गाउँपालिकामा भने केही महिना पहिलेदेखि निर्माणको कार्य अगाडि बढेको छ भने अन्य स्थानीय तहमा निर्माण व्यवसायीको ढिलासुस्तीका कारण अस्पताल अलपत्र अवस्थामा रहेका छन् ।

अस्पतालको शिलान्यास गर्नका लागि तत्कालीन केन्द्रीय मन्त्रीदेखि प्रदेश सांसदहरूको होडबाजी चलेको थियो । एकै दिन एक नेताले तीन अस्पतालसम्मको शिलान्यास गरेका थिए ।