खोज

काठमाडौँ ।

सभापति शेरबहादुर देउवाले कार्यवाहक सभापति तोकेपछि नेपाली कांग्रेसको संस्थापन समूहले विशेष महाधिवेशनको औचित्य सकिएको निष्कर्ष निकालेको छ ।

कार्यवाहक सभापतिको जिम्मेवारी पाएको अर्को दिन पूर्णबहादुर खड्काले बोलाएको संस्थापन गुटको बैठकमा नेताहरूले सभापतिले कार्यवाहक तोकिसकेपछि विशेष महाधिवेशनको औचित्य सकिएको निष्कर्ष निकालेका हुन् ।

ललितपुरको धोबीघाटस्थित सिद्धार्थ कटेजमा बसेको बैठकमा सभापति देउवाले कार्यवाहकको जिम्मेवारी दिँदा नियमित महाधिवेशन निर्धारित मितिमा गर्न भनेका थिए । त्यसअनुरुप कार्यवाहक सभापति र पदाधिकारीले बुधबारको केन्द्रीय कार्यसमिति बैठकमा कार्यतालिका माग गर्ने धारणा राखेका हुन् । बैठकमा सहभागी एक केन्द्रीय सदस्यले कार्यतालिकासँगै महाधिवेशन गर्ने आधार पनि माग्ने धारणा नेताहरूले राखेको जानकारी दिए ।

१४ औँ महाधिवेशनबाट सभापतिमा निर्वाचित भएका देउवाले अहिलेसम्म गुटगत बैठक राखेका थिएनन् । खड्काले कार्यवाहक पाएको अर्को दिन राखेको बैठकमा पूर्वउपसभापतिहरू विमलेन्द्र निधि र विजयकुमार गच्छदार, पूर्वमहामन्त्रीहरू कृष्णप्रसाद सिटौला, प्रकाशमान सिंह, डा. शशांक कोइराला सहभागी थिए ।

वर्तमान सहमहामन्त्रीहरू महालक्ष्मी उपाध्याय ‘डिना’ र उमाकान्त चौधरीसहित बहुमत केन्द्रीय सदस्यहरू सहभागी बैठकमा नेताहरूले कार्यवाहक सभापति खड्कालाई बिहीबारदेखि सुरु हुने केन्द्रीय समिति बैठकमा नियमित महाधिवेशनको कार्यतालिकासहित मिति तोक्न सुझाएका थिए ।

बैठकको सुरुवात गर्दै खड्काले पछिल्लो परिस्थितिबारे ब्रिफिङ गर्दै कसरी अगाडि बढ्ने भन्नेबारे सुझाव मागेका थिए ।

बैठकमा सहभागी एक सदस्यका अनुसार सभापति देउवामाथि भएको हमलाको छानबिन गर्नुपर्ने, पार्टीभित्र बेमेलको अन्त्य, जेनजी आन्दोलन हुनुपर्ने अवस्था कसरी आयो भन्ने छानबिन गर्नुपर्नेलगायत धारणा राखेका छन् ।

बैठकमा सहमहामन्त्री उपाध्यायले जेनजी आन्दोलनका विषयमा राज्य संयन्त्रमा पार्टीका तर्फबाट बसेकाहरूले सभापति देउवालाई गलत सूचना दिएको भन्दै असन्तुष्टि जनाएकी एक सदस्यले बताए । भदौ २२ गते साँझ देउवालाई जेनजी आन्दोलनमा तीन/चार सय मात्रै सहभागी हुने भनेर गलत सूचना दिइएको उनले बताएकी थिइन् । र सभापतिलाई त गलत सूचना दिनेले अरूलाई कसरी राज्य संयन्त्रले सही सूचना दिन्छ भन्ने प्रश्न उनले उठाएपछि नेताहरू मुखामुख गरेका पनि ती सदस्यले बताए ।

धेरैजसो नेताहरूले केपी शर्मा ओली नेतृत्वको सरकारमा गएका नेताहरूले पार्टीमा सही सूचना नदिएको भन्दै आपत्ति जनाएका थिए ।

महामन्त्रीद्वय गगन थापा र विश्वप्रकाश शर्माको नेतृत्वमा विशेष महाधिवेशन माग गर्दै हस्ताक्षर गरेपछि त्यसको कसरी प्रतिवाद गर्ने रणनीति तय गर्न खड्काले बैठक बोलाएको बुझिएको छ ।