खोज

बुटवल, २९ असोज ।

रुपन्देहीको लुम्बिनी साँस्कृतिक नगरपालिकाको प्रशासनिक भवन निर्माणको ठेक्का सम्झौता भएको छ ।
नेपाल सरकार, एसियाली विकास बैंक र लुम्बिनी साँस्कृतिक नगरपालिकाको आर्थिक प्राविधिक सहयोगमा नयाँ भवन निर्माण हुने प्रशासनिक भवन निर्माणको जिम्मा बाबुल एनबी जेभीले पाएको छ नगरपालिकाले जनाएको छ ।

लुम्बिनी सांस्कृतिक नगरपालिका कार्यभार प्रमुख कल्पना हरिजनले तोकिएको समयमा नै भवन बन्ने बताउदै भवन बने पछि जनताले एकै ठाउँ बाट सेवा पाउने बताइन् लुम्बिनी साँस्कृतिक नगरपालिका प्रमुख प्रशासकीय अधिकृत तारा ज्ञवालीका अनुसार प्रशासनिक भवन निर्माणको सम्झौता असोज २८ गते मंगलवार भएको छ भने विक्रम सम्बत २०८४ साल असोज २७ गते भवन निर्माण सम्पन्न गर्नुपर्ने अवधि तोकिएको छ ।

लुम्बिनी साँस्कृतिक नगरपालिका वडा न. ३ लन्कापुर र ठुलो पडरियाको बिचमा तेलार नदी संगैको जग्गामा प्रशासनिक भवन निर्माणको लागि २५ करोड ७० लाख ८६ हजार ६ सय ९८ मा ठेक्का सम्झौता भएको हो । लुम्बिनी सांस्कृतिक नगरपालिकाले नगरको प्रशासनिक भवन निर्माणका लागि जग्गा छनौट, नेपाल सरकारबाट जग्गा प्राप्ति, नेपाल सरकार र एसियाली विकास बैकसंग समन्वय, सहजिकरण र सहकार्यका लागि सवैसंग आभार प्रकट गर्दै धन्यबाद दिएको छ ।

त्यसैगरी अन्य प्राविधिक प्रकृयाहरुमा पूर्ण साथ र सहयोग प्रदान गर्ने र सहभागिता जनाउने नगरवासी, वडा नम्बर ३ का वडावासी, नगर कार्यपालिका, ३ नं. वडा समिति, जिल्ला प्रशासन कार्यालय, मालपोत कार्यालय, नापी कार्यालय भैरहवा, भुमी व्यवस्था विभाग काठमाडौ, नेपाल सरकार र एसियाली विकास बैंकप्रति नगरपालिकाले धन्यवाद सहित आभार प्रकट गरेको छ ।

नगरपालिकाले प्रशासनिक भवन निर्माण गुणस्तरीय रुपमा र तोकिएकै समयमा निर्माण पक्षले सम्पन्न गर्ने अपेक्षा समेत गरेको छ । यस्तै नगरपालिका समन्वय प्रमुख तुल्सी लामिछानेले नगरपालिकाको नयाँ भवन बन्ने भएसी स्थानीय खुसी रहेको बताए ।