खोज

बुटवल, २४ असोज ।

विश्व मानसिक स्वस्थ्य दिवसको अवसरमा लायन्स इन्टरनेशनल ३२५ पी नेपालको सप्ताहव्यापी कार्यक्रम लायन्स क्लब बटौलीले सचेतनामुलक साइकल र्याली तथा अभिमुखिकरण कार्यक्रम सम्पन्न गरेको छ ।

“सेवामा पहुँच — विपद् र आपतकालीन अवस्थाहरूमा मानसिक स्वास्थ्य”, मानसिक स्वास्थ्यः हाम्रो अधिकार, हाम्रो जिम्मेवारी !, मानसिक सशक्तिकरणबाट समाजलाई बलियो बनाऔं !, “मानसिक स्वास्थ्य आपतकालीन परिस्थितिमा” लगायतका मानसिक स्वास्थ्यका सन्देशसहित प्लेकार्ड प्रदर्शन गर्दै साइकल र्याली बुटवल योगीकुटीबाट सुरु भएर कालिकापथ हुदै देविनगर, मोतीपुर, रानीगंज, हिरापुर, सौ फर्साटिकर, पोखराबारी, शान्तिचोक हुँदै योगीकुटीमा पुगेर समापन भएको थियो ।

कार्यक्रमको उद्घाटन गर्दै डिष्ट्रिक गभर्नर बालाराम भट्टराईले लायन्स डिष्ट्रिकमार्फत सात दिनदेखि निरन्तर सचेतना, शिक्षा, लक्षित वर्गलाई सहयोग गर्ने जस्ता कार्यक्रम गर्दै आएको बताए । आम जनसमुदायमा मानसिक स्वास्थ्यको बारेमा सचेतना जगाउने नया र रचनात्मक ढंगको कार्यक्रम भएको उनले बताए ।

कार्यक्रममा नेपाल मनोरोग चिकित्सक संघ केन्द्रीय महासचिव मनोज ढुंगानाले विश्वमा नै राजनीतिक, भुक्षय, युद्ध, बाढीपहिरो जस्ता कारणबाट मानसिक समस्यबाट गुज्रिरहेको बताए । ‘यस्तो अवस्थामा मानिसहरुमा डर, भय र चिन्ता देखिनु स्वभाविक हो ।’–उनले भने । उनीहरुमा मनोसामाजिक सहयोग गर्न सके दीर्घकालीन समयमा मानसिक समस्याहरु, मानसिक रोगहरु आउनबाट रोक्न सकिने बताए । स्वास्थ्य ब्यक्ति हुन सकेमात्र स्वास्थ्य समाजको कल्पना गर्न सकिने उनले बताए ।

यसैबिच सौ फर्साटिकर बजारमा भएको अभिमुखिकरण कार्यक्रमको प्रथम भिडिजि सन्दिप कशौधनले समयावधिलाई ध्यानमा राखेर साइकलमार्फत सन्देश दिने गरी महत्वपूर्ण कार्यक्रम भएको बताए । ग्रामीण क्षेत्रका बासिन्दालाई लक्षित गरी अभिमुखिकरण कार्यक्रम गरी विशेषज्ञ चिकित्सकबाट मनोविज्ञान, एन्जायटी र ओभरथिंकिङजस्ता समस्याबाट हटाउने उपायहरु ज्ञान दिने प्रभावकारी कार्यक्रम भएको बताए ।

कार्यक्रममा क्लबका अध्यक्ष विष्णु प्रसाद गौतमले मानसिक स्वास्थ्य जस्तो संवेदनशील विषयमा जनचेतना फैलाउने उदेश्यका साथ कार्यक्रम गरेको बताए । शारीरिक स्वास्थ्यका साथै मानसिक स्वास्थ्यमा पनि समाजले ध्यान दिन जरुरी रहेको हुँदा मानसिक समस्याबारे खुलेर कुरा गर्न सक्ने वातावरण बनाउनु आजको आवश्यकता भएको बताए ।
उनले साईकल ¥याली तथा अभिमुखिकरण जस्ता कार्यक्रमले समाजमा सकारात्मक सन्देश फैलाएको बताउँदै आगामी दिनमा पनि यस्ता कार्यक्रमलाई निरन्तरता दिइने प्रतिवद्धता जनाए ।

कार्यक्रममा लायन्स डिष्ट्रिक जोन २४ का चेयरपर्सन लोक प्रसाद भण्डारी, एलसी बटौलीका संस्थापक अध्यक्ष बिनित भट्टराई, कार्यक्रम संयोजक स्वस्तिक श्रेष्ठले समुदायस्तरमा मानसिक स्वास्थ्यप्रति जागरण ल्याउने र सहयोगात्मक वातावरण निर्माण आजको आवश्यकता भएको बताए ।