खोज

भैरहवा, ११ असोज ।

स्थल मार्ग हुँदै सबैभन्दा बढी पर्यटक भित्र्याउने रुपन्देहीको बेलहिया नाकामा चालु अङ्ग्रेजी वर्षको सेप्टेम्बर २५ तारिख सम्म ५८ देशका ६३ हजार ७ सय ९३ जना नेपाल प्रवेश गरेका छन् ।

सेप्टेम्बर महिनामा मात्र १ हजार ४ सय ४२ जना पुरुष र १ हजार १ सय १७ जना महिला गरी ४ हजार ५ सय ५९ जना नेपाल प्रवेश गरेका छन् भने १ हजार ४ सय २ जना पुरुष तथा ३ हजार १ सय महिला गरी ४ हजार ५ सय ६ जना पर्यटक नेपालबाट बाहिरिएको तथ्याङ्कले देखाएको छ ।

अध्यागमन कार्यालय बेलहियाका अध्यागमन अधिकृत वासुराम पौडेलका अनुसार अहिलेको सिजनमा सबैभन्दा बढी श्रीलङ्का र भियतनामका पर्यटकहरूको बढी आगमन देखिन्छ भने माघ र फागुन तिर कोरियन पर्यटकको आगमन हुने गरेको छ ।

सेप्टेम्बर महिनामा जेनजी आन्दोलन न्यून रूपमा मात्र पर्यटन आगमनमा असर पारेको छ । गत वर्षको सेप्टेम्बर महिनाको २५ तारिख सम्म ५ हजार ६ सय ३ जना पर्यटकको आगमन भएकोमा यस वर्ष सोही अवधिमा ४ हजार ५ सय ५९ जना पर्यटकको आगमन देखिएको पौडेलले बताए ।

आन्दोलनको क्रममा नेपाली अध्यागमन कार्यालय बन्द नगरिए पनि सुरक्षाको कारण भारतबाट पर्यटकहरू फर्केको कारण सङ्ख्या थोरै कम देखिएको उनको भनाइ छ ।  देश अनुसार तथ्याङ्क केलाउँदा सबैभन्दा बढी पर्यटक श्रीलङ्काबाट आउने गरेको देखिन्छ ।

सन् २०२४ मा सबैभन्दा बढी पर्यटक श्रीलङ्काबाट २६ हजार ५ सय ७७ जना, थाइल्याण्डबाट २१ हजार ३ सय ९७ जना, म्यानमारबाट ११ हजार ४सय २२ जना, भियतनामबाट ७ हजार ४ सय ८४ जना र दक्षिण कोरियाबाट ३ हजार ८ सय ४ जना नेपाल प्रवेश गरेका थिए ।

यसै गरी सन् २०२५ को अगस्त महिना सम्ममा पनि श्रीलङ्काली पर्यटक नै बढी देखिएका छन् । अध्यागमन कार्यालयले उपलब्ध गराएको तथ्याङ्क अनुसार श्रीलङ्काका १९ हजार ८ सय ३५ जना, थाइल्याण्डका १२ हजार ३ सय ४५ जना, म्यानमारका ९ हजार २ सय ७८ जना, भियतनामबाट ४ हजार १ सय ८८ र दक्षिण कोरियाबाट २ हजार २४ जना पर्यटक नेपाल भित्रिएका छन् ।

कोभिडको कारण सुस्त भएको नेपालमा पर्यटक आगमनको क्रम कोभिड यता केही सुधारोन्मुख देखिए पनि पहिलाको अवस्थामा अझै आउन सकेको छैन ।

अध्यागमन कार्यालयले उपलब्ध गराएको तथ्याङ्क अनुसार सन २०१८ मा १ लाख ६६ हजार २ सय ३५ जना पर्यटकको आगमन तथा १ लाख ५६ हजार ५ सय ६३ जनाको प्रस्थान भएको थियो भने २०१९ मा १ लाख ६१ हजार ६ सय ९१ जनाको आगमन र १ लाख ५० हजार ५ सय ३७ जनाको प्रस्थान भएको थियो ।

सन २०२० मा कोभिडको कारण नेपाल आउने पर्यटकको सङ्ख्या घटेर आगमन तर्फ ४३ हजार ३ सय ६७ जना र प्रस्थान ४० हजार ६९ जना पुगेको थियो । सन २०२१ मा यो सङ्ख्या अझै घट्यो आगमन ८ सय १२ जना तथा प्रस्थान २ सय १९ जना मात्रै रहेको अध्यागमन कार्यालयले उपलब्ध गराएको तथ्याङ्कमा उल्लेख छ ।

त्यसपछि भने हालसम्म बिस्तारै पर्यटकको ग्राफ उकालो लाग्दै गए पनि पहिलाकै अवस्थामा फर्कन अझै धेरै समय लाग्ने देखिन्छ । सन् २०२२ मा पर्यटकको आगमन २० हजार २ सय २० जना र प्रस्थान १८ हजार ९ सय ४४ जना पुगेको थियो भने सन २०२३ मा ८१ हजार ५ सय ५१ जना आगमन तथा ७८ हजार ४सय २३ जना बेलहिया नाका हुँदै प्रस्थान गरेका थिए ।

सन् २०२४ मा यो सङ्ख्या अझै बढेर आगमनतर्फ ९२ हजार ६ सय ४४ जना र प्रस्थानतर्फ ९३ हजार २ सय ९० पुगेको छ । अध्यागमन अधिकृत वासुदेव पौडेलले पछिल्लो समय अध्यागमन कार्यालय आफ्नै नयाँ भवनमा सरेपछि सेवा प्रवाहमा निकै सहजता आएको बताए ।

उनले अहिले पर्यटकहरूको लागि प्रतीक्षालय, शौचालय लगायत न्यूनतम आवश्यकता सम्बन्धी पूर्वाधार पुरा भए पनि जनशक्तिको अभाव भने रहिरहेको बताए । १२ जना जनशक्ति रहेको कार्यालयमा ५ जनाले सेवा दिइरहेको उनले बताए ।