खोज

गुल्मी,७ असोज ।

गुल्मीमा चाडपर्व नजिक आउँदा पनि बजार अनुगमनको अवस्था भने शून्य रहेको छ ।  चाडपर्वको मौका छोपी बजारमा अखाद्य बस्तुहरू बिक्री हुने, म्याद गएका समानहरू बिक्री वितरण हुनेसँगै कालोबजारी हुन सक्ने हुँदासमेत बजार अनुगमनमा भने सरोकारवाला निकाय मौन जस्तै गरी बसेको पाइएको छ ।

गुल्मी जिल्लाका प्रमुख जिल्ला अधिकारी विष्णुप्रसाद कोइरालाले स्थानीय तहका उपप्रमुख तथा उपाध्यक्षहरूलाई चाडपर्व लक्षित बजार अनुगमन गर्नका लागि आग्रह गरेको बताउँदै उहाँहरूको नै मुख्य भूमिका हुने बताएका छन् ।

जिल्ला प्रशासनको प्रतिनिधि मागेमा आफू जुनसुकै समयमा पनि प्रतिनिधि पठाउन तयार रहेको उनको भनाइ छ ।  दुई नगरपालिकासहित १२ स्थानीय तह रहेको जिल्लामा चाडपर्व लक्षित बजार  अनुगमन हुन सकेको छैन ।

रेसुङ्गा नगरपालिकाका सूचना प्रविधि अधिकृत सुरेश खनालले चाडपर्व लक्षित बजार अनुगमन गर्ने गरी योजना बनाएको बताएका छन् । बजारमा अखाद्य वस्तु बिक्री गर्ने र कालोबजारी गर्ने छुट कसैलाई नभएको बताउँदै कानुन विपरीतका कार्यहरू गरेमा कानुन अनुसारको कारबाही गरेरै छाड्ने उनले दाबी गरे ।

काली गण्डकी गाउँपालिका उपाध्यक्ष मञ्जु दर्लामीले घरेलु तथा साना उद्योग कार्यालय गुल्मीको संयोजनमा बजार अनुगमन गर्ने गरी योजना बनाएको बताएकी छिन्  । यता गुल्मी उद्योग वाणिज्य सङ्घका वरिष्ठ उपाध्यक्ष ताराप्रसाद भुसालले जिल्लाका व्यापारीहरूलाई अनिवार्य रूपमा मूल्य सूची राख्न र दसैँमा छुट दिएर बेच्नका लागि अनुरोध गरेको बताएका छन् ।

अनुगमन गर्ने निकाय आफूहरू नभएको बताउँदै स्थानीय तह र घरेलु तथा साना उद्योग कार्यालयले गर्ने अनुगमनमा आफूहरू प्रतिनिधिको रूपमा उपस्थित हुने गरेको उनको भनाइ छ ।