खोज

बुटवल, ०७ असोज ।

तपाईँ दसैँको यात्रा गर्दै हुनुहुन्छ, परदेशबाट घर देशको यात्रा पो तय गर्दै हुनुहुन्छ, तर बुटवल लगायतका आसपासमा आउँदा यात्रा गर्ने रकम सकियो, गन्तव्यसम्म जानको लागि समेत आर्थिक अभाव भयो भने बुटवलमा ‘नागरिक सहायता कक्ष’ स्थापना गरिएको छ ।

बेखर्चीलाई बाटा खर्चको समेत व्यवस्था गर्ने गरी बुटवलमा घटस्थापनाको दिनदेखि नै नागरिक सहायता कक्ष स्थापना गरिएको हो ।  बुटवल नयाँ बसपार्कमा स्थापना गरिएको नागरिक सहायता कक्षमा स्थानीय यात्रुहरूको लागि समस्यामा परेका यात्रुहरूले सम्पर्क गर्ने छन् ।

जसमा प्रहरी प्रशासन र व्यवसायीहरू समेत बस्ने छन् । जसबाट कुनै समयमा यात्रुको गन्तव्य समस्यादेखि लिएर अग्रिम टिकट बुकिङ गरेका यात्रुहरूको समेत समाधान गरिने पश्चिम नेपाल बस व्यवसायी प्रालिका अध्यक्ष दधिराम खरेल बताउँछन् । उनका अनुसार बेखर्चीहरूलाई बाटा खर्च समेत दिने गरी तयारी गरिएको हो ।

अध्यक्ष खरेल भन्छन्–‘हाम्रो सानो सहयोगले यात्रुको यात्रा सहज हुन्छ भने यसमा किन सहयोग नगर्ने भन्ने विषयमा हामी सोँचबिचार गरेका छौँ ।’ बुटवल लगायतका स्थानमा रहेका पश्चिम नेपाल बस व्यवसायीहरूको बस सञ्चालन रहेका स्थानका समेत यात्रुलाई गन्तव्यमा पु¥याउनको लागि सहज दायित्व समेत निर्वाह गरिने अध्यक्ष खरेलले जानकारी दिए ।

पश्चिम नेपाल बस व्यवसायी प्रालि नेपालमा सबैभन्दा बढी व्यवसायीहरू आबद्ध भएको संस्था समेत हो । बुटवल देखि देशभर र देशका विभिन्न स्थानबाट बुटवल लगायत पहाडी क्षेत्रमा समेत नियमित रूपमा बस, माइक्रो र हायस लगायतका गाडीहरू सञ्चालन हुँदै आएका छन् ।

टिकट अग्रिम बुकिङ 
पश्चिम नेपाल बस व्यवसायी प्रालि सहित बुटवल यातायात लगायतले बुटवल देखि लुम्बिनी प्रदेशका विभिन्न जिल्लाहरू तराई र पहाडी जिल्लाको लागि अग्रिम टिकट बुकिङ खुल्ला गरेको छ । घटस्थापना दिन भन्दा पहिलादेखि नै बुकिङ खुल्ला गरिएको र जसको लागि बुटवल बसपार्कमा आएर यात्रुले साविक भाडदारमा नै टिकट काट्नको लागि यातायात व्यवसायी सङ्घ संस्थाहरूले आग्रह गरेका छन् ।

यात्रु गन्तव्यमा जाँदा दोहोरो टिकट पर्ने, एउटा सिटमा दुई वटा टिकट काट्ने समस्या विगतका दिनमा हुने गरेको जनगुनासो आएपछि यो वर्ष भने अधिकतम सचेतना अपनाइएको र यात्रुको सङ्ख्या बढी भएको स्थानमा थप गाडीको व्यवस्थापन गरी सञ्चालन गरिने पश्चिम नेपाल बस व्यवसायी प्रालिका अध्यक्ष दधिराम खरेल बताउँछन् ।

उनका अनुसार प्रालिले एक तर्फी रूपमा यात्रुको लागि सेवा दिन लागेका गाडीलाई तेल खर्च बापत दिएर सोही अनुसारको गाडी सञ्चालन गरिने विगतको परम्परालाई यस वर्ष पनि निरन्तरता दिएको छ ।

नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय बुटवलका प्रमुख मित्रबन्दु शर्माले यात्रुको सेवा नै सबैभन्दा ठुलो सेवा भएको भन्दै सोही अनुसारको सेवा प्रवाहमा विशेष जोड दिइएको जानकारी दिए ।

उनका अनुसार चाडपर्वमा विभिन्न सम्भावित जोखिम न्यूनीकरणको लागि प्रदेशका सबै जिल्ला र मातहतका निकायमा नियमित रूपमा ब्रिफिङ र सहजीकरण गरिँदै आएको जानकारी दिए । यात्रुको सेवामा सबै जना लाग्नुपर्ने अहिलेको आवश्यकता रहेको भन्दै प्रमुख पोखरेलले सोही अनुसार सबै क्षेत्रमा सहजीकरण गरिएको बताए ।

इलाका प्रहरी कार्यालय बुटवलका प्रमुख इन्द्र बहादुर रानाले चाडपर्वमा हुने सम्भावित चोरी, डकैती, झैँ झगडा लगायतका विषयमा जानकारी प्राप्त हुँदा साथ प्रहरीमा खबर गर्न आग्रह गर्दछन् ।

चाडपर्वमा सम्भावित जोखिम न्यूनीकरणको स्वयं जनतानै सचेत भएमा जोखिम न्यूनीकरण हुन सक्ने भन्दै उनले भड्किलो पहिरन, गरगहना भन्दा पनि सादा जीवनयापन गर्न र केही थप अप्रिय समस्या भएमा प्रहरीलाई खबर गर्न आग्रह गरे ।