खोज

गुल्मी,२८ भदौ ।

गुल्मीको सदरमुकाम तम्घासमा रहेको थ्रिडी पार्कले २०७६ सालदेखि सदरमुकाम तम्घाससँगै रेसुंगा नगरपालिका र प्रशासनलाई गिज्याइ रहेको छ ।

पार्क बनेको लामो समयसम्म प्रयोगमा नआएका कारण पार्कमा घाँस पलाउनुका साथै संरचनाहरु टुटफुट हुँदै जाने र मर्मत गर्नुवाहेकको अन्य केही काम हुन सकेको छैन् । सबैको नजर पुग्ने सदरमुकाम तम्घासमै सरकारी संरचना प्रयोगविहीन हुँदा प्रयोगमा ल्याउनका लागि कसैको ध्यान जान नसक्नु दुःखद पक्ष रहेको छ । रेसुंगा नगरपालिका र लुम्बिनी प्रदेश सरकारको ५०/५० प्रतिशत साझेदारीमा ५५ लाखको लागतमा पार्क निर्माण भएको लामो समयदेखी प्रयोगविहीन अवस्थामा छ ।

५५ लाखको निर्माण पश्चात रेसुङगा नगरपालिकाले विभिन्न समयमा गरी १० लाख भन्दा बढी रकम मर्मतमा खर्चिएको छ । ६५ लाख बढी खर्चिएको पार्कमा सडक बालबालिकाले रजाइँ गर्ने गरेका छन् ।
जिल्ला प्रशासन कार्यालय र जिल्ला समन्वयको अगाडि रहेको पार्क प्रयोगविहीन हुँदा र राज्यको लाखौँ रकम यसै खेर जाँदा सरोकारवाला निकाय यसै मौन रहेका छन् ।

नागरिक समाज गुल्मीका अध्यक्ष पदमप्रसाद पाण्डेले थ्रिडी पार्क निर्माण गरेर राज्यको रकम दुरुपयोग भएको बताएका छन् । नागरिकले सरकारलाई खवरदारी गर्ने पहिलेको लाँकुरी मञ्चलाई हटाएर निर्माण गरिएको संरचनाले राज्यको रकम दुरुपयोग हुनु र सञ्चालनमा नआउनु दुःखद भएको बताए । लामो समयसम्म पार्क सञ्चालनमा ल्याउन नसक्नु नगरपालिकाको कमजोरी भएको उनको भनाइ छ ।

प्रमुख जिल्ला अधिकारी बिष्णुप्रसाद कोइरालाले आँफू केही हप्ता पहिले मात्रै जिल्लामा आएको बताउँदै पार्क सञ्चालनका लागि पहल गर्ने बताएका छन् । सरकारी लगानीमा बनेको संरचनालाई यसै खेर जान नदिने उनको भनाइ छ ।
यता रेसुंगा नगरपालिकाका प्रवक्ता रामजी पन्थीले पार्क सञ्चालनका लागि निजी क्षेत्रलाई दिने सहमति भए पनि पछि निजी क्षेत्रले सुरक्षाको वाहाना बनाउँदै सञ्चालन नगर्ने भने पछि थप अन्योल भएको बताएका छन् । पार्क सञ्चालनका लागि नगरले योजना बनाउने उनको भनाइ छ ।

धेरै समय पहिलेदेखि पार्क निजी क्षेत्रलाई सञ्चालनमा ल्याउनका लागि दिने बताए पनि त्यसको कार्यान्वयन भने हुन नसकी पार्क यसै बेवारिसे जस्तै बनेको छ ।