खोज

भैरहवा, २५ भदौ ।

जेन जी आन्दोलनको दोस्रो दिन भैरहवा तनावग्रस्त रह्यो । बिहान केही शान्त देखिएको भैरहवामा एक्कासि प्रधानमन्त्री केपी शर्मा ओली भैरहवा हुँदै भाग्ने हल्लाले तनावमय बन्यो ।

प्रधानमन्त्री केपी शर्मा ओली हेलिकप्टरमा भैरहवा आउने र गौतमबद्ध अन्तर्राष्ट्रिय विमानस्थल हुँदै बाहिर भाग्ने हल्ला फैलिएपछि आन्दोलनकारीहरू विमानस्थल लक्षित भएका थिए ।

आन्दोलनको क्रममा आन्दोलनकारीहरूले भैरहवा स्थित गौतमबद्ध अन्तर्राष्ट्रिय विमानस्थलमा आगजनी सँगै सरकारी र जनप्रतिनिधिका घर गरि एक दर्जन बढी संरचनामा क्षति पुर्‍याएका छन् ।

गौतमबद्ध अन्तर्राष्ट्रिय विमानस्थलको पार्किङमा रहेका ४ वटा सरकारी गाडी र केही मोटरसाइकलहरू आन्दोलनकारीले जलाई दिए भने त्यहाँ रहेका अन्य संरचनामा पनि क्षति पुर्‍याएका छन् ।

यस्तै नेपाली काँग्रेसका पार्टी कार्यालय, रुपन्देही जिल्ला अदालत, जिल्ला सरकारी वकिलको कार्यालय, आन्तरिक राजस्व कार्यालय रुपन्देही, सिद्धार्थनगरपलिकाको कार्यालय, रुपन्देही जिल्ला अदालत, जिल्ला ट्राफिक कार्यालय, भैरहवा भन्सार कार्यालय, नेपाल विद्युत् प्राधिकरण, सिद्धार्थनगर नगर पालिकाका प्रमुख ईस्तियाक अहमद खाँन, उप प्रमुख उमा अधिकारी, प्रदेश खेलकुद मन्त्री सन्तोष कुमार पाण्डेको घरमा आगजनी गरि ध्वस्त बनाई दिएका छन् ।

यसै गरि भैरहवा स्थित भाटभटेनी, होटेल मौर्या, रेडसन होटल लगायतमा अराजक समूहले लुटपाट समेत गरेको छ । आन्दोलनकारीले जनप्रतिनिधि र सरकारी कार्यालयहरू खोजी खोजी आगो लगाइरहँदा रुपन्देही प्रशासन भने मूकदर्शक बनेको थियो । गौतमबद्ध अन्तर्राष्ट्रिय विमानस्थलमा सेनाको सुरक्षा टोली रहे पनि उनीहरू पनि मौन रहे ।

दिउसो भैरहवाको खजहनामा जम्मा भएका युवाहरूको टोली विमानस्थल पुगेका थिए । सोमबारको आन्दोलनमा आफ्ना १९ जना साथी गुमाएर आक्रोशित बनेको आन्दोलनकारीहरू विमानस्थल पुगेपछि प्रहरीसङ केही बेर घम्साघम्सी नै पर्‍यो ।

यसै बिच आन्दोलनकारीहरू विमानस्थल पुग्ने खबर पाएको विमानस्थल प्रशासनले भने विज्ञप्ति निकालेर अर्को सूचना नभए सम्मको लागि विमानस्थल बन्द भएको जानकारी गरायो ।

विमानस्थल पुगेका आन्दोलनकारीलाई प्रहरीले त्यही विज्ञप्ति देखाउँदै ओली आउने खबर हल्ला मात्र भएको भनेर बुझाएपछि र त्यही बिच प्रधानमन्त्री केपी शर्मा ओलीले राजीनामा दिएको खबर बाहिरिए पछि आन्दोलनकारीहरू केही शान्त भएका थिए ।

त्यसपछि केही बेरको नाराबाजी र करिब १ मिनेटको मौनधारणपछि उनीहरूको टोली भैरहवा तर्फ मोडियो । अहिले सम्म प्रधानमन्त्रीको राजीनामा तर्फ केन्द्रित रहेको आन्दोलनकारी अब प्रहरीले थुनामा राखेका आफ्ना कार्यकर्ता छोड्न दबाब दिन थाल्यो ।

सोही क्रममा जिल्ला प्रहरी कार्यालय पुगेको आन्दोलनकारले आफ्ना कार्यकर्ता छुटाए । जिल्ला प्रहरी कार्यालय रुपन्देहीका प्रमुख प्रहरी उपरीक्षक प्रदीप बहादुर क्षेत्रीले १९ जनालाई छोडेको पुष्टि गरे ।

जिल्ला प्रहरी कार्यालयबाट निस्केको आन्दोलनकारीले भने त्यसपछि जिल्ला प्रशासन कार्यालय हुँदै भैरहवामै रहेको नेपाली कांग्रेसको पार्टी कार्यालयमा फेरी तोडफोड गरे ।

उनीहरू कार्यालयमै पसेर भित्र रहेको समान बाहिर निकालेर तोडफोड गरे पनि आगजनी भने गर्न पाएनन् । प्रहरीले अश्रुग्याँस प्रहार गरि आन्दोलनकारीलाई तितरबितर पार्‍यो ।

पार्टी कार्यालयबाट निस्केको टोल भने त्यसपछि भने समाचार तयार पार्दा सम्म विमानस्थल, विद्युत् कार्यालय, बुद्ध चोक, देवकोटा चोक लगायतका क्षेत्रमा टायर बालेर प्रदर्शन गरेका थिए ।