खोज

समाचार सारांशमा

• ---

  भैरहवा भन्सारको सर्भर समस्या कारण मालवाहक ट्रकहरूको जाँच पासमा समस्या  ।

  

• ---

  भारततर्फ सीमा पार गर्ने ट्रकहरूको लाइन १२ किलोमिटरसम्म लम्बिएको दैनिक जागरण पत्रिकाले उल्लेख ।

  ---

• भैरहवा भन्सार प्रमुख शिवलाल न्यौपानेले सर्भर समस्या भएको भन्ने कुरा अस्वीकार ।

  ---

भैरहवा, १९ भदौ । 

नेपाली र भारतीय भन्सार अधिकारीहरूको तालमेल नमिल्दा त्यसको असर मालवाहक ट्रकहरूमा देखिएको छ । भारततर्फ मालवाहक ट्रकहरूको लामो लाइन लागेको छ ।

भारतीय पत्रिका दैनिक जागरणले मंगलबार सीमा भन्दा १२ किलोमिटर पर सम्म यस्ता मालवाहक ट्रकहरूको लाम लागेको समाचार प्रमुखताका साथ प्रकाशित गरेको छ ।

पत्रिकाको अनुसार भैरहवा भन्सार कार्यालयको सर्भरमा समस्या आएकोले ट्रक जाँच पासमा समस्या आएको र यसैको कारण लामो लाइन लागेको उल्लेख छ । यता भैरहवा भन्सार कार्यालयले यो कुरालाई नकारेको छ ।

भैरहवा भन्सार कार्यालयका प्रमुख भन्सार अधिकृत शिवलाल न्यौपानेका अनुसार भारततर्फ लाइन लागेको भए त्यो भैरहवा भन्सारको कारण नभई उतैको कारण हुन सक्ने बताए ।

“भारतीय पत्रिकामा उल्लेख भए जस्तो १२ किलोमिटर सम्म नै ट्रकहरूको लाइन लागेको छैन, करिब ६ किलोमिटर भने छ ।” न्यौपानेले भने “यो अन्य दिनमा पनि हुने गर्दछ, अहिले चाडपर्व पनि नजिकिँदै गएकोले पनि चाप बढ्न सक्छ ।”

उनले भैरहवा भन्सार कार्यालयमा औसतमा दैनिक ५ सय वटा सम्म मालसामान बोकेका विभिन्न गाडीहरू भित्रिने गरेको बताउँदै अहिले पनि यो सङ्ख्या नियमित रहेको दाबी गरे ।

न्यौपानेका अनुसार अहिले भारत तर्फ बाटो र पुलहरू स्तरोन्नति हुने अवस्थामा रहेका छन्, यसले पनि केही अवरोध गरेको हुन सक्छ, यस अतिरिक्त सुनौलीमा बाटोमै विभिन्न पसलहरूले बाटो छेकेको कारण पनि आवागमन नियमित हुन नसकेको रिपोर्टिङ आएको बताए ।

यसबारे भारतीय पक्षसँग कुरा अगाडी बढेको बताउँदै प्रमुख भन्सार अधिकृत न्यौपानेले चाडै नै दुवै पक्षको समन्वयमा समस्या समाधान गरिने दाबी गरे । भैरहवा भन्सार कार्यालयका सूचना अधिकारी नगेन्द्र चौधरीले पछिल्लो करिब डेढ महिनामा उल्लेखनीय प्रगति भएको बताए ।

अहिले पर्व लक्षित सामानहरू आयात हुने भएकोले पनि सवारीहरूको चाप देखिएको हुन सक्ने उनको भनाइ छ । विशेषतः लत्ता कपडा, चामल लगायत अन्य दैनिक उपभोग्य समानहरूको आयातमा वृद्धि भएको चौधरीले बताए ।

यस अघि बुटवल–नारायणगढ बाटोले भन्सार राजस्वमा समेत गम्भीर असर पु¥याए पनि अहिले त्यो समाधान भएकोले भन्सार राजस्वमा उल्लेख प्रगति भएको उनले बताए । “पछिल्ला केही समस्याहरूको कारण हामी लक्ष्यमा पुग्न सकिरहेका थिएनौ, अहिले राम्रो हुँदै गएको छ । सिस्टमले पनि राम्रै काम गरिरहेका छ ।”

उनले भने “यस्तो अवस्थामा हाम्रो तर्फबाट कुनै प्रकारको अवरोध छैन, भारतमा केही छ भने त्यसको पनि उपाय खोज्नेछौँ ।”

सूचना अधिकारी समेत रहेका चौधरीले साउन महिनामा सबै भन्दा बढी मोटरसाइकल त्यसपछि क्रमशः जिप कार भ्यान, पेट्रोल, सुपारी, सिङ्गल क्याब पिक अप गाडी, शुद्ध फलाम, अलकत्रा, डबल क्याब पिक अप, एलपी ग्यास र एम एस विलेट भित्रिएको बताए ।