गुल्मी, १३ भदौ ।
गुल्मीको बडीगाड पारीका नागरिकहरूलाई इलाका प्रशासनको चिन्ता रहे पनि नेताहरूलाई भने भोटको चिन्ताले गर्दा इलाका प्रशासन स्थापना हुन सकेको छैन । केही दिन पहिले सङ्घीय सरकारले देशका थप २३ स्थानमा नयाँ इलाका प्रशासन कार्यालय स्थापना गर्ने निर्णयमा गुल्मी नपरेपछि स्थानीयदेखि केन्द्रीय नेताहरूको आलोचना सुरु भएको छ ।
सदरमुकामबाट भौगोलिक रूपले कालीगण्डकी, सत्यवती र चन्द्रकोट गाउँपालिकालाई प्रशासनको सेवा लिनका लागि तम्घास जान समय र पैसा दुवै बढी खर्च हुने गर्दछ । कालीगण्डकी गाउँपालिका वडा नम्बर ६ को लुङबाट तम्घास जान करिब ८० किलोमिटर यात्रा गर्नुपर्दछ ।
त्यहाँबाट नियमित रूपमा गाडी नचल्ने भएकाले नागरिकता, पासपोर्ट बनाउनका लागि गाडी नै रिर्जव गरेर जानुपर्ने बाध्यता हुन्छ । केही महिना पहिले कालीगण्डकी गाउँपालिकाबाट सेवा लिन तम्घास पुग्दा प्रशासनले राहदानीका लागि टोकन सकिएको बताएपछि रिसको झोकमा पालिका अध्यक्ष वेदबहादुर थापाले स्क्यानरनै फुटाइदिएका थिए ।
कालीगण्डकीबाट तम्घास सेवा लिन पुग्दा दिनको करिब तीन बज्ने र सहज रूपमा सेवा लिन नपाउँदा त्यस दिन बास बसेर अर्को दिन सेवा लिनुपर्ने बाध्यता रहेको छ । कालीगण्डकी ५ का रिषी रानाले यस समस्यालाई समाधान गर्नका लागि इलाका प्रशासन नै आवश्यक रहेको बताए ।
नागरिकलाई इलाका प्रशासनको चिन्ता रहे पनि राजनीति गर्ने स्थानीय नेताहरूले भने आफूहरूको अनुकूलमा इलाका प्रशासन हुनुपर्ने तर्क राख्दै आएका छन् ।
स्थानीय सरकार आफू अनुकल बनाउने पक्षमा
सत्यवती गाउँपालिकाका अध्यक्ष टीकाराम पाण्डेले गाउँपालिकाको वडा नम्बर ६ जोहाङमा भौतिक संरचना पनि तयारी अवस्थामै रहेकाले इलाका प्रशासन जोहाङ नै उपयुक्त हुने दाबी गरे ।
इलाका प्रशासनका लागि जोहाङ प्राथमिक स्वास्थ्य केन्द्रको भौतिक संरचना उपलब्ध गराउने बताउँदै चन्द्रकोटको मजुवामा नापी र मालपोत कार्यालय भएकाले विकेन्द्रीकरणको नीति अनुसार पनि जोहाङ नै उपयुक्त हुने उनको भनाइ छ ।
२०६५ सालको निर्णय कार्यान्वयन गरौँ: क्षेत्री
चन्द्रकोट गाउँपालिकाका अध्यक्ष युवराज क्षेत्रीले २०६५ सालमै सामान्य प्रशासन मन्त्रालयले जिल्लाको सहमतिमै चन्द्रकोट गाउँपालिकाको मजुवामा इलाका प्रशासन राख्ने निर्णय गरेकाले त्यसैलाई नै कार्यान्वयन गर्नुपर्नेमा जोड दिए । निर्णय भएको विषय बस्तुलाई कार्यान्वयन नगरी अनावश्यक हल्ला गर्नु र विरोधको कुनै तर्क नरहेको उनको भनाइ छ ।
सहज र सरल रूपमा सेवा आवश्यक: थापा
कालीगण्डकी गाउँपालिकाका अध्यक्ष वेदबहादुर थापाले नागरिकलाई सहज र सरल रूपमा पहुँच पुग्ने स्थानमै इलाका प्रशासन हुनुपर्नेमा जोड दिए । त्यसका लागि सबै हिसाबले रुरु क्षेत्र गाउँपालिकाको रिडी नै उपयुक्त हुने उनको दाबी छ ।
रुरुमा सबैलाई पायक पर्छ: ज्ञवाली
रुरु क्षेत्र गाउँपालिकाका अध्यक्ष यदु ज्ञवालीले रुरुक्षेत्रको रिडीमा इलाका प्रशासन राख्दा सबैलाई पायक पर्ने बताए । सडक सञ्जालले जोडिएको क्षेत्र पनि भएको भौतिक संरचना पनि तयारी अवस्थामा रहेको बताउँदै यहाँका लागि कालीगण्डकी गाउँपालिकाले सहमति दिइसकेको र अन्य पालिकासँग पनि समन्वय भइरहेको उनको भनाइ छ ।
समन्वय गर्छु: प्रजिअ
गुल्मी जिल्लाका प्रमुख जिल्ला अधिकारी विष्णुप्रसाद कोइरालाले आफू केही हप्ता पहिले जिल्लामा आएकाले सबै विषयवस्तु थाहा नभएको बताए । इलाका प्रशासनका लागि आफूले जिल्लालगायत केन्द्रसम्म समन्वय गर्ने उनको भनाइ छ ।
जिल्लाबाटै आएन: पूर्व मन्त्री ज्ञवाली
गुल्मी क्षेत्र नम्बर एकका पूर्व प्रतिनिधि सभा सदस्य तथा मन्त्री प्रदीप ज्ञवालीले जिल्लाबाट सिफारिस हुन ढिला भएका कारण अहिले हुन नसकेको बताए । तत्कालका लागि नभए पनि इलाका प्रशासन राख्नका लागि आफूले पहल गरेको उनको भनाइ छ ।
गुल्मी क्षेत्र नम्बर एकका प्रतिनिधि सभा सदस्य चन्द्रकान्त भण्डारीले जिल्लामा सर्वपक्षीय सहमति अनुसार जिल्ला सुरक्षा समितिबाट सिफारिस गरेर पठाउनका लागि आफूले पहल गरेको बताए । यसमा आफूले कुनै राजनीति गर्नु भन्दा पनि सबैलाई पायक पर्ने स्थानमा नै राख्नु उपयुक्त हुने उनको भनाइ छ ।
६ पुष २०८२, आइतबार
